Përdoruesit e heroinës në ‘rehabilitim’ të ashpër nga talebanët

Fotografitë dokumentojnë sesi luftëtarët talebanë në Kabul, mblodhën 150 përdorues droge të pastrehë të cilëve iu hoqën dhe iu rruajtën kokat para se të mbylleshin në kushte të ngjashme me burgun për tre muajt e ardhshëm.

Pasi deklaruan qëllimin e tyre për të shtypur industrinë e madhe të prodhimit të opiumit në Afganistan, talebanët po e kthejnë vëmendjen drejt përdoruesve të shumtë, të varur nga droga.

Të armatosur me kamxhik dhe pushkë, luftëtarët javën e kaluar zbritën në një nga zonat famëkeqe të përdorimit të drogës në Kabul, nën një urë në rrethin Guzargah të qytetit, dhe mblodhën 150 njerëz, shumë prej tyre të pastrehë dhe të varur nga heroina dhe metamfetamina e prodhuar në vend.

Aksioni u kap në një seri fotografish dhe intervistash nga gazetarët që punonin për Associated Press. “Ata janë bashkatdhetarët tanë, ata janë familja jonë dhe ka njerëz të mirë brenda tyre”, tha një luftëtar taleban. “Dashtë Zoti, njerëzit në spital do të jenë mirë me ta dhe do t’i shërojnë ata”.

Gjërat e njerëzve u hodhën mbi një zjarr dhe u dogjën para se të çoheshin në qendrën më të madhe të rehabilitimit të drogës në qytet, Spitalin Mjekësor Avicenna për Trajtimin e Drogës, ku të sapoardhurit u zhveshën, u lanë dhe iu rruajtën kokat.

“Ky është vetëm fillimi: më vonë do të shkojmë pas fermerëve dhe do t’i ndëshkojmë sipas ligjit të Sheriatit”, tha oficeri kryesor i patrullës Qari Ghafoor.

Sipas shpërndarësve të drogës që punojnë në terren, ka rreth 100 mijë deri në 150 mijë injektues të heroinës në Kabul, shumë prej të cilëve janë gjithashtu të varur nga pirja e duhanit dhe injektimi i metamfetaminës, një drogë që tani po prodhohet në vend.

Spitali, një bazë ushtarake amerikane e quajtur Camp Phoenix, u hap në vitin 2016 dhe drejton një program trajtimi 45-ditor, me kapacitet deri në 1 mijë pacientë. Por opioidet mjekësore të përdorura për të hequr qafe njerëzit nga heroina, të tilla si buprenorfina dhe metadoni, janë tharë dhe stafi nuk është paguar që nga korriku.

Mat Southwell, një këshilltar teknik britanik për OJQ-të në zvogëlimin e dëmit të drogës në Afganistan, i cili vizitoi Avicenën në vitin 2018, ndërsa ishte nën kontrollin e qeverisë së mëparshme, tha për se: “këta njerëz në thelb po rrëmbehen për tre muaj dhe mbyllen. Ata do të marrin shumë pak trajtim mjekësor dhe nevojat e tyre nuk do të adresohen. Sapo të lirohen, ata thjesht do të fillojnë të përdorin drogë përsëri.

“Është një vend brutal i rrethuar nga roje të armatosura. Duket si një kamp përqendrimi sepse ata rruajnë kokën e njerëzve dhe i bëjnë ata të veshin pizhama. Kur isha atje fola me një ushtar në ushtrinë afgane i cili ishte kapur ndërsa po blinte drogë. Ai kishte frikë se do të ndëshkohej”.

Southwell tha se luftëtarët e regjimit po luftojnë shpërndarësit e drogës dhe po djegin pikat e nxehta të shpërndarjes së drogës në qytet në një përpjekje për të zvogëluar furnizimin. Por ai shtoi se talebanët ende po lejojnë programet e metadonit, ku përdoruesve të drogës u jepet zëvendësimi i heroinës nga mjekët, për të operuar në tre qytete, përfshirë Kabulin.

Ai shpreson se regjimi mund të ndihmojë përdoruesit e drogës. “Ne duhet të angazhohemi me talebanët për mënyrën më të mirë për t’u marrë me drogën. A duan ata të jenë të njohur për persekutimin e atyre që janë në margjina apo mund të bëhet një qeveri që u siguron qytetarëve të tyre më të cenueshëm trajtimin e duhur për varësinë nga droga?”

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.