Presidentja e Kosovës, Vjosa Osmani, gjatë qëndrimit të saj në Singapor është takuar me kryeministrin e këtij shteti, Lee Hsien Loong, me të cilin kanë biseduar për rëndësinë e bashkëpunimit ekonomik.
Përvec kryeministri të Singaporit, në “Bloomberg New Economy Forum”, e para e vendit ka takuar edhe Ministrin e Tregtisë dhe Industrisë, Gan Kim Yong, themeluesin e Bloomberg, Michael Bloomberg, si dhe me udhëheqës të bizneseve më të fuqishme botërore.
“Së bashku diskutuam për rëndësinë e bashkëpunimit ekonomik, si dhe për angazhimin e përbashkët për një të ardhme më inovative dhe të qëndrueshme”, ka shkruar Osmani në llogarinë e saj në Facebook.
Gjatë ditës, Osmani është takuar edhe me presidentin e Singaporit, Tharman Shanmugaratnam, me të cilin ka diskutuar për të thelluar bashkëpunimin.
Përmes një shkrimi në rrjetin social Facebook, Osmani ka thënë se për qëllim kanë rritjen e bashkëpunimit ekonomik.
“Falënderoj presidentin e Singaporit, Tharman Shanmugaratnam për pritjen e ngrohtë! Presidentin Shanmugaratnam e urova për marrjen e detyrës dhe njëkohësisht patëm diskutim përmbajtjesor për thellimin e marrëdhënieve në mes të dy shteteve tona, sidomos në fushën e bashkëpunimit ekonomik”, ka shkruar Osmani.
Osmani me presidentin e Singaporit, diskutojnë për thellimin e marrëdhënieve
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com