Osmani: Shqetësuese trendi i rritjes së rasteve të dhunës seksuale në Kosovë

Presidentja e Kosovës, Vjosa Osmani në prezantimin e raportit monitorues të Misionit të Bashkimit Evropian për Sundim të Ligjit në Kosovë (EULEX), “Vlerësimi i trajtimit të rasteve të dhunimit nga sistemi i drejtësisë në Kosovë”, është shprehur e shqetësuar me trendin e rritjes së vazhdueshme të rasteve të dhunës seksuale në Kosovë.

Duke shpresuar që njëra nga arsyet e rritjes së këtyre rasteve është vetëdijesimi i grave dhe besimi i tyre në institucione për t’i raportuar rastet e tilla.

“Vendi ynë tashmë ka marrë përsipër një sërë obligimesh për të trajtuar dhunën ndaj grave, që dalin jo vetëm nga legjislacioni i brendshëm por veçanërisht nga Konventa e Stambollit, të cilën unanimisht e kemi bërë pjesë të Kushtetutës sonë”.

“Zotimet e tilla ndërkombëtare nuk janë thjesht deklarative, në fakt na detyrojnë neve si shtet që të luajmë rol më proaktiv në parandalim si dhe në hetim dhe dënim mbi bazën e dhunës mbi baza gjinore”, është shprehur presidentja Osmani.

Ndërkaq, sipas ministres së Drejtësisë, Albulena Haxhiu, raste të tilla mbesin shqetësuese pasi 85 për qind të rasteve të dhunës seksuale në tri vitet e fundit janë të mitur.

“Ministria e Drejtësisë konsideroi se si asnjëherë më parë e ka bërë prioritet adresimin e dhunës në familje, dhunës seksuale, psikike, materiale. Në këtë drejtim jemi duke punuar shumë që secilën prej përgjegjësive që kanë institucionet të adresohet siç duhet”, tha Haxhiu.

Gjithashtu, shefi i misionit EULEX, Lars-Gunnar Wigemar, sqaroi se raporti mbështet institucionet e Kosovës në adresimin e dhunës seksuale.

“Ky raport është pjesë e një përpjekje të përgjithshme të EULEX për t’i mbështetur institucionet e Kosovës në adresimin e dhunës kundër grave në përgjithësi dhe dhunimit në veçanti. Kjo është në përputhje me kriteret e konventës së Stambollit”.

Ndërkaq, drejtori i Përgjithshëm i Policisë së Kosovës, Samedin Mehmeti, ka kërkuar angazhim ndërinstitucional për luftimin e kësaj dukurie.

Mehmeti, tha se Policia e Kosovës ka disa prioritete gjatë trajtimit të këtyre veprave penale.

“Për të luftuar dhunën seksuale është e nevojshme marrja e një sërë veprimesh dhe masave esenciale dhe parandaluese nga institucionet për të përmirësuar perceptimin e shoqërisë ndaj kësaj kategorie si dhe duke mbështetur viktimat me vënien e kryerësve para përgjegjësitë”.

Ndryshe, në këtë raport jepet një vlerësim preliminar për mënyrën se si i trajton sistemi i drejtësisë në Kosovë rastet e dhunimit.

Ky raport përfshinë gjetje dhe rekomandime konkrete për autoritetet e Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.