Një palestinez u qëllua për vdekje nga ushtria izraelite në Bregun Perëndimor

Një palestinez është qëlluar për vdekje nga forcat izraelite gjatë një konfrontimi që pasoi një bastisje të ushtrisë në kampin e refugjatëve, Balata pranë qytetit verior të Nablus-it në Bregun Perëndimor të pushtuar.

Ministria palestineze e Shëndetësisë e identifikoi 21-vjeçarin, Bakeer Mohammad Hashash dhe tha se ai u qëllua për vdekje në agim të së enjtes me një plumb në kokë.

Familja e Hashash tha për mediat lokale se ushtria izraelite po përpiqej ta arrestonte për një kohë të gjatë.

Në një intervistë me video, nëna e Hashash tha se ai u largua nga shtëpia nga frika e arrestimit kur dëgjoi për bastisjen e ushtrisë në kamp.

Vëllai i tij u citua nga mediat lokale të ketë thënë se Hashash ishte në një konfrontim me forcat izraelite përpara se të vritej.

Një protestë pasoi në kampin e refugjatëve Balata – më i madhi në Bregun Perëndimor të pushtuar – pas vrasjes.

Ushtria izraelite kryen bastisje të tilla në Bregun Perëndimor të pushtuar pothuajse çdo ditë, duke përfshirë zonat nën kontrollin e Autoritetit Palestinez me bazë në Ramallah, entiteti i njohur ndërkombëtarisht që ka autonomi të kufizuar në qendrat e qyteteve.

Të paktën 21 palestinezë u arrestuan në bastisjet gjatë natës të enjten nëpër qytete dhe fshatra të ndryshëm në Bregun Perëndimor të pushtuar, duke përfshirë tetë nga fshati Deir Nitham, në perëndim të Ramallah.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.