Murali emocionues në ishullin Rikers do të zhvendoset në Muzeun e Brooklyn-it

“For the Women’s House” i Faith Ringgold, i cili synonte të frymëzonte femrat e burgosura, do të zhvendoset përpara mbylljes së afërt të kompleksit të burgut.

Murali i Ringgold, “Për shtëpinë e grave” (1971), qe ekspozuar më parë në një ekspozitë të Muzeut të Brooklyn-it në vitin 2017. Tashmë, piktura do të zhvendoset përgjithmonë në muze, në pritje të heqjes së saj nga kompleksi i burgut Rikers.

Për 50 vitet e fundit, një mural i artistit amerikan Faith Ringgold ka banuar në ishullin Rikers, shtëpia e kompleksit famëkeq të burgjeve të qytetit të New York-ut.

I krijuar në vitin 1971 për një institucion rehabilitimi të grave, komisioni i artit publik përshkruan gra të profesioneve të ndryshme – një mjeke, një oficer policie, një punëtore ndërtimi, një basketbolliste – dhe ishte krijuar për të inkurajuar femrat e burgosura të imagjinojnë mundësitë e një të ardhmeje më të mirë.

Pasi u var në vende të ndryshme nëpër Rikers, “For the Women’s House” u zhvendos në Rose M. Singer Center, një strukturë për gratë e paraburgosura, rreth vitit 2000.

Edhe pse u shfaq në një vend të spikatur – në palestër, mbi rrathët e basketbollit- për më shumë se një dekadë, murali u zhvendos më vonë në një korridor të largët, ku pak mund ta shihnin atë.

Tani, pas një fushate të gjatë nga Ringgold, vepra e artit do të zhvendoset në Muzeun e Brooklyn-it, raporton Zachary Small për New York Times.

Departamenti i Korrigjimit dhe aktivisti Chirlane McCray njoftoi masën në fund të dhjetorit, pak para se bashkëshorti i McCray, Bill de Blasio, të përfundonte mandatin e tij si kryebashkiak i qytetit të New York-ut.

Një mural i ri do të zëvendësojë veprën e artit të Ringgold në ishullin Rikers, i cili është planifikuar të mbyllet përgjithmonë deri në vitin 2027.

Në pritje të shqyrtimit nga Komisioni i Dizajnit Publik të NYC, “For the Women’s House” do të hyjë në koleksionet e përhershme të Muzeut të Brooklyn dhe do të shfaqet në Qendrën Elizabeth A. Sackler për Artin Feminist në katin e katërt të institucionit kulturor, sipas Valentina Di Liscia nga Hyperallergic.

“Kjo administratë e ka bërë prioritet ekspozimin e veprave të artit të papara dhe të paparalajmëruara që na japin një këndvështrim tjetër për çështjet e rëndësishme të kohës sonë”, tha McCray në një deklaratë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.