MPB e Serbisë: “Xhandarmëria serbe e gatshme për kundërpërgjigje”

Vendimi i ditës së hënë i Qeverisë së Kosovës për vendosjen e reciprocitetit për targat e automjeteve nga Serbia, ka bërë që shteti i Serbisë të vazhdojë me provokime.

Ministria e Punëve të Brendshme në Serbi ka publikuar një video të xhandarmërisë serbe, ku shihen ushtarët dhe automjete ushtarake, duke përfshirë edhe auto-blinda.

Ndërsa, në këtë video është parë edhe ministri i Brendshëm i Serbisë, Aleksandar Vulin.

“Xhandarmëria është gati që të kryejë detyrat e caktuara nga Serbia dhe presidenti Vuçiç”, thuhet në përshkrimin e videos.

Po ashtu gjatë mbrëmjes së të hënës mediat në Serbi raportuan se veturat ushtarake serbe i janë afruar kufirit me Kosovën pas tensioneve në veri.

Në orët e hershme të mëngjesit të 20 shtatorit, Policia e Kosovës, konkretisht Njësia Speciale operative është vendosur në pikë kalimin e vjetër kufitarë në mes të Kosovës dhe Serbisë, në Jarinje të komunës së Leposaviçit, për të filluar reciprocitetin e targave.

Të gjitha veturat që deri më tani kanë pasur targa të Serbisë, duhet t’i zëvendësojnë ato me targa të Republikës së Kosovës, nëse duan të qarkullojnë brenda vendit.

Aksioni i Policisë së Kosovës është pasuar me reagime të shumta si nga shtetasit serbë të cilët jetojnë në Kosovë ashtu edhe nga politikanët serbë të cilët veprojnë në këtë vend.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.