Lukaku pritet të mungojë deri në muajin tetor

Gazetat kryesore sportive italiane pretendojnë se lëndimi i Romelu Lukaku-t do të zgjasë deri në fillim të muajit tetor.

Interi konfirmoi të hënën se sulmuesi i tyre kishte pësuar një dëmtim në kofshën e majtë dhe se gjendja e tij do të vlerësohet sërish javën e ardhshme.

Kjo do të thotë se i huazuari i Chelsea-t do të humbasë ndeshjen kundër Cremonese-s, derbin e së shtunës “Della Madonnina” me Milan-in dhe ndeshjen hapëse të zikaltërve në Ligën e Kampionëve me Bayern-in në javën e ardhshme.

Sipas asaj që shkruajnë mediat italiane, sulmuesi belg nuk do të kthehet nga lëndimi para pushimit të ndeshjeve ndërkombëtare të muajit shtator.

La batosta di Roma, Lukaku ko, il derby: l' #Inter adesso saprà essere squadra? https://t.co/pHEQrpHU6H

— La Gazzetta dello Sport (@Gazzetta_it) August 30, 2022

Sulmuesi dëshiron të kthehet në fushë sa më shpejt të jetë e mundur dhe e njëjta gjë vlen edhe për Inzaghi-n, por mediat në Itali theksojnë që skenari më i mirë i mundshëm për rikthimin e Lukaku-t, do të ishte në ndeshjen ndaj Udinese-s që do të zhvillohet para ndërprerjes së kampionatit në muajin shtator.

Kujtojmë që belgu u rikthye në huazim te Inter-i nga Chelsea në këtë verë dhe në tri ndeshjet e para të sezonit ka shënuar një gol dhe ka dhuruar një asistim.

Ndeshjet e ardhshme të Interi-t janë kundër Cremonese-s, Milan-it, Bayern-it, Torino-s, Viktoria Plzen dhe Udinese-s.

Nënkampionët e Italisë presin Romën e Jose Mourinho-s në “San Siro” në ndeshjen e parë pas pushimit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.