Synimi i Kurtit për ta (ri)marrë Prizrenin | Totaj: Sa ka qenë LVV-ja në pushtet, qyteti ka përjetuar fazën e stagnimit

Kryetari i komunës së Prizrenit, Shaqir Totaj, në një përgjigje për Albanian Post të dielen, derisa komentoi synimin e kryeministrit të Kosovës, Albin Kurti, njëherësh kryetar i Lëvizjes Vetëvendosje (LVV), i cili u shpreh i bindur se partia që udhëheq do të kthehet në qeverisje, tha se gjatë mandatit katërvjeçar të LVV-së, qyteti përjetoi fazën e stagnimit.

“Sa ka qenë në pushtet në Prizren, qyteti e ka përjetuar fazën e stagnimit. Prizreni e ka tejkaluar këtë fazë të stagnimit dhe tashmë qeveriset shumë mirë. Dhe kthim mbrapa nuk ka! Vazhdojmë plus katër”, u shpreh Totaj, i cili në zgjedhjet komunale të vitit 2021 mposhti ish-kryetarin nga radhët e LVV-së, Mytaher Haskuka, duke fituar 1 mijë e 75 vota më shumë.

Në një komunikatë të lëshuar të dielen nga subjekti më i madh politik në nivel qendror, duke i bërë jehonë 300 anëtarësimeve të reja, kreu i ekzekutivit kosovar citohet të ketë thënë: “Në Prizren kishim një shkëputje të shkurtër por po kthehemi dhe këtë e dëshmon anëtarësimi i lartë dhe i vazhdueshëm i qytetarëve në subjektin tonë. Prizreni frymon me lëvizjen”.

Ndryshe, në kohën kur kryeministri Kurti hyri në vitin e katërt të mandatit qeverisës, gati çdokush flet për mundësinë e zgjedhjeve të parakohshme në Kosovë – madje edhe prej partisë në pushtet. Megjithatë, në bazë të kalendarit, zgjedhjet parlamentare dhe lokale do të mbahen në të njëjtin vit, përkatësisht në vitin 2025 – në një distancë prej afërsisht 8 muajsh.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.