Kryeministri i Kosovës, Albin Kurti, ka përkujtuar vdekjen e liderit të Iniciativës Qytetare SDP, Oliver Ivanoviç, duke shprehur ngushëllime për familjen.
Ai përmes një video-mesazhi ka thënë se, “sot ne përkujtojmë jetën dhe kujtimin e Oliver Ivanoviçit, në ditën e vdekjes së tij. Mendimet dhe ngushëllimet e mia janë me familjen dhe miqtë e tij”.
Kurti është shprehur për Ivanoviç se, “ishte një person i përkushtuar për të luftuar për interesat e komunitetit dhe qytetit të tij”.
“Ai e bëri këtë duke qenë i hapur, i sinqertë, gjithmonë i mprehtë në çështjet me rëndësi, por edhe i respektueshëm edhe ndaj atyre me të cilët nuk ishte dakord. Do të dëshiroja që kujtimi i tij të mbetet i gjallë, kujtimi i tij si një njeri që punoi për një të ardhme të qëndrueshme dhe për një Kosovë shumë etnike”.
Kryeministri, tutje ka kërkuar drejtësi për vdekjen e liderit të Iniciativës Qytetare SDP, duke kujtuar edhe mënyrën e vrasjes së tij.
“Pesë vjet më parë, Oliver Ivanoviç u vra në rrugët e Mitrovicës. Të gjithë ata që kryejnë një krim në Kosovë duhet të dalin para drejtësisë dhe më vjen keq që autorët dhe ata që e kanë porositur këtë krim ende nuk janë nxjerrë para drejtësisë”, ka shtuar tutje kreu i ekzekutivit.
Kërkesë e tij, ka qenë angazhimi i të gjitha institucioneve përkatëse për të gjetur dhe dënuar përgjegjësit për vrasjen e tij.
“Vrasja e Oliverit ndikoi gjithë shoqërinë. Ky krim vrau jo vetëm Oliver Ivanoviçin, por edhe pluralizmin politik te serbët”, ka potencuar Kurti.
“Kosova do të jetë e palëkundur në përkushtimin e saj për të qenë një shoqëri multikulturore dhe shumë etnike ku njerëzit ndihen të sigurt, mund të thonë mendimet e tyre dhe ta trajtojnë njëri-tjetrin me respekt, edhe nëse nuk pajtohen. Në këtë mënyrë të gjithë do ta ruajmë kujtimin e Oliver Ivanoviçit”.
Saktësisht në kohën dhe vendin ku është vrarë politikani serb, Oliver Ivanoviç të hënën e 16 janarit, familjarët dhe shokët kanë ndezur qirinj, për ta përkujtuar dhe kanë kërkuar drejtësi për vrasjen e tij.
Oliver Ivanoviç, që udhëhiqte nismën qytetare “Liria, demokracia, drejtësia” (SDP), u vra më 16 janar 2018 para objektit të partisë së tij në Mitrovicën e Veriut.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
I shkaktuan shtetit 60 milionë lekë dëm me skemat e TVSH-së, masa arresti e detyrim paraqitje për 7 persona
-
Netanyahu: Përgjegjësia për 7 tetorin është e qeverisë
-
Basha: Nuk mund të jesh kundër korrupsionit ditën, e kundër SPAK-ut natën
-
Operacioni izraelit i lë në gjendje ‘katastrofike’ spitalet e Rafahut
Lajmet kryesore
-
Reforma në Drejtësi është e pakthyeshme, politika duhet të bëjë më shumë, thonë SHBA-të dhe BE-ja
-
Basha: Nuk mund të jesh kundër korrupsionit ditën, e kundër SPAK-ut natën
-
Izraeli dhe SHBA: Gjurmët e dyshimit dhe armiqësisë së një marrëdhënieje të veçantë
-
Hoxha: Hetuesit nga policia u larguan me dëshirë, s’ka pasur presion