Pasuria neto e themeluesit të Amazon-it, Jeff Bezos, ra me 13.5 miliardë dollarë. Kjo, pasi kompania raportoi të ardhura që ishin nën pritshmëritë e analistëve.
Rënia hoqi 80 përqind të rritjes në pasurinë neto të Bezos për këtë vit, raportoi Bloomberg. Rënia e madhe është e barabartë me 58 përqind të buxhetit të NASA -s për vitin 2021.
Rezultatet e tremujorit të dytë të Amazon janë ato që kanë prekur pasurinë e Bezos. Rezultatet e shpallura pas tregut të enjten e 29 korrikut, nuk plotësuan pritshmëritë e Wall Street.
Ky mund të jetë një sinjal që lidhet me rritjen e shitjeve që gjiganti i shitjes me pakicë pati në internet. Kjo, e ushqyer nga pandemia kur konsumatorët blinin online për të shmangur dyqanet fizike.
Amazon publikoi të ardhura mbi 100 miliardë dollarë për tremujorin e tretë, por këto shifra nuk ishin të mjaftueshme për të shmangur rënien e çmimit të aksioneve.
Çmimi i aksioneve të Amazon u ul 7.2 përqind në rreth 3 mijë e 340 dollarë të premten, duke ulur pasurinë e themeluesit dhe ish-drejtorit të saj, në rreth 196.6 miliardë dollarë, nga një pikë fillestare prej rreth 207 miliardë dollarësh.
Bezos ende klasifikohet si personi më i pasur në botë edhe pas rënies, rreth 8 miliardë dollarë përpara themeluesit të Tesla-s, Elon Musk.
Fitimet e Alphabet, kompania mëmë e Google, rritën pasurinë e bashkëthemeluesve Sergey Brin dhe Larry Page, ndërsa Bill Gates dhe Mark Zuckerberg nuk e panë pasurinë e tyre neto të rritet, pavarësisht rezultateve solide nga Microsoft dhe Facebook.
Zuckerberg u mburr për vizionin e tij për të ardhmen e Facebook si “metaverse” javën e kaluar, por humbi 5.4 miliardë dollarë të enjten pasi aksionet e kompanisë përjetuan rënien e tyre më të madhe në dy muaj pas shqetësimeve për rritjen e shitjeve të reklamave të saj. Aksionet e Facebook aktualisht vlerësohen në rreth 355 dollarë.
Fokusi i Bezos duket të jetë më shumë drejt kompanisë së tij hapësinore, Blue Origin, pas fluturimit të tij të parë në hapësirë në fillim të këtij muaji.
Kompania ka shitur më shumë se 100 milionë dollarë bileta për udhëtimet e ardhshme në hapësirë.
Bezos ka mbajtur postin e personit më të pasur në botë që nga marsi pasi humbi vendin për pak kohë ndaj Musk.
Themeluesi i Amazon dha dorëheqjen si CEO i tij në fillim të këtij viti, por ende zotëron pak më shumë se 10 përqind të kompanisë dhe shërben si kryetar ekzekutiv i saj.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
