Italia do të rifillojë financimin e Agjencisë së OKB-së për refugjatët palestinezë, njofton Tajani

Ministri i Jashtëm italian, Antonio Tajani, njoftoi se Roma do të rivendoste fondet për agjencinë e OKB-së për refugjatët palestinezë, teksa u takua me kryeministrin palestinez Mohammed Mustafa.

“Italia ka vendosur të rifillojë financimin e projekteve specifike të destinuara për ndihmën ndaj refugjatëve palestinezë, por vetëm pas kontrolleve rigoroze që garantojnë se asnjë qindarkë nuk rrezikon të përfundojë në mbështetje të terrorizmit”, tha ai.

Tajani tha se e kishte informuar kryeministrin vizitues “se qeveria ka aranzhuar financime të reja për popullsinë palestineze, për një total prej 35 milionë eurosh”.

“Nga kjo, pesë milionë do t’i ndahen UNRWA-s,” tha ai në një deklaratë, ndërsa 30 milionë euro të mbetura do t’i ndahen nismës “Ushqim për Gazën” të Italisë, në koordinim me agjencitë e ndihmës të OKB-së.

UNRWA, e cila koordinon pothuajse të gjithë ndihmën për Gazën, ka qenë në krizë që nga janari, kur Izraeli akuzoi rreth një duzinë nga 13 mijë punonjësit e saj në Gaza se ishin përfshirë në sulmin e tetorit ndaj Izraelit nga Hamasi.

Kjo bëri që shumë vende, përfshirë donatorin kryesor, Shtetet e Bashkuara, të pezullonin fondet për agjencinë, duke kërcënuar përpjekjet e saj për të ofruar ndihma në Gaza, megjithëse disa prej tyre kanë rifilluar që atëherë pagesat.

Një rishikim i pavarur i UNRWA, i udhëhequr nga ish-ministrja e Jashtme franceze Catherine Colonna, gjeti disa “çështje të lidhura me neutralitetin”, por tha se Izraeli nuk kishte dhënë ende prova për akuzat e tij kryesore.

E krijuar në vitin 1949, agjencia punëson rreth 30 mijë njerëz në territoret palestineze, Jordani, Liban dhe Siri.

Mustafa më vonë do të takohej me kryeministren italiane, Giorgia Meloni.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.