Inflacioni i Eurozonës me rënie më të mprehtë se sa pritej

Inflacioni në eurozonë ra më shumë se sa pritej në dhjetor si pasojë e çmimeve më të ulëta të energjisë, duke i dhënë fund një periudhe dymujore me norma dyshifrore.

Indeksi i shpejtë i publikuar nga Eurostat të premten tregoi se çmimet e konsumit u rritën me një normë vjetore prej 9.2 për qind në dhjetor, nga 10.1 për qind në muajin e kaluar dhe një normë vjetore rekord prej 10.6 për qind në tetor.

Normat vjetore të inflacionit varionin nga 20.7 për qind në Letoni në 5.6 për qind në Spanjë. Rënia e normës mesatare në të gjithë bllokun tejkaloi pritjet për një rënie në 9.5 për qind në një sondazh të “Bloomberg” me ekonomistët.

“Rënia e inflacionit dhe përmirësimi i ndjenjës ekonomike në dhjetor sugjerojnë se rasti i stagflacionit të eurozonës nuk është aq i mprehtë sa ishte frika disa muaj më parë”, tha Andreë Kenningham, kryeekonomist për Evropën në konsulencën Capital Economics.

Megjithatë, inflacioni bazë, duke përjashtuar çmimet më të paqëndrueshme të ushqimeve dhe energjisë, të cilat ranë ndjeshëm në dhjetor, u rrit ende në një nivel të ri prej 5.2 për qind, duke tejkaluar pritjet e ekonomistëve se shifra do të mbetej në normën 5 për qind të regjistruar në nëntor. Çmimet bazë u rritën 0.6 për qind vetëm në dhjetor.

Në dhjetor, vlerësimi i Eurostat-it për inflacionin vjetor të çmimit të energjisë qëndroi në 25.7 për qind, shumë më poshtë normës së nëntorit prej 34.9 për qind, ndërsa norma e rritjes së çmimeve të shërbimeve dhe mallrave industriale joenergjetike u rrit më lart.

Rritja e inflacionit bazë vjetor theksoi frikën e politikbërësve se kostot më të ulëta të naftës, gazit dhe energjisë elektrike do të ulnin normën totale pa adresuar presionet themelore inflacioniste.

Me rritjen e çmimeve bazë në më shumë se dyfishin e objektivit të inflacionit prej 2 për qind të Bankës Qendrore Evropiane, Philip Rush, themeluesi i konsulencës Heteronomics, tha: “Inflacioni nuk do të jetë në gjendje të kthehet në mënyrë të qëndrueshme në objektiv derisa të mposhtet ky problem thelbësor”.

François Villeroy de Galhau, guvernatori i bankës qendrore franceze, tha të enjten se BQE-ja do të duhet të vazhdojë të rrisë normat e interesit për të trajtuar presionet themelore të çmimeve.

Ai tha se programi i shtrëngimit monetar ndoshta do të përfundojë deri në verë, por nuk tha se sa më tej mendonte se normat e interesit duhet të rriteshin nga norma aktuale prej 2 për qind. Tregjet financiare presin një kulm të normave të interesit të eurozonës prej rreth 3.5 për qind.

BQE ka sinjalizuar synimin e saj për të rritur normat me 0.5 pikë përqindjeje si në takimet e shkurtit dhe marsit, me lëvizje që mund të udhëhiqen nga të dhënat e ardhura mbi presionet bazë inflacioniste dhe shtrirja e një rënieje ekonomike evropiane.

Bert Colijn, ekonomist i lartë i eurozonës në ING, tha se, “me rënien e shpejtë të inflacionit të energjisë dhe përmirësimin e parashikimeve të furnizimit me energji, 2 për qind mund të arrihet shumë më shpejt se sa pritej”.

“Megjithatë, rritja e inflacionit bazë do të jetë e mjaftueshme që BQE të vazhdojë të rritet me 0.5 pikë përqindjeje në shkurt dhe mars”.

Treguesi më i fundit i ndjenjës ekonomike sugjeroi se eurozona po shkonte më mirë se ç’pritej, me çmimet që ranë 0.3 për qind në muajin dhjetor, si pasojë e një rënie prej 6.5 për qind të çmimeve të energjisë.

Indeksi tregoi një rritje prej 1.8 pikë përqindjeje në 95.8 për qind të mesatares afatgjatë për treguesin 100. Pritjet e punësimit ishin përgjithësisht të qëndrueshme në dhjetor dhe shumë mbi mesataren afatgjatë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.