Gjatë konferencës së parë për shtyp të Festivalit Sanremo 2021, Zlatan Ibrahimoviç foli për mundësinë e takimit me Lukakun në skenën e Ariston. Kampioni i Milanit është shprehur në favor të diçkaje të tillë:
“Nuk ka asnjë problem personal midis nesh. Ajo që ndodhi në fushë mbetet në fushë. Nëse dëshiron të vijë këtu, është i mirëpritur.”
Veç kësaj, Ibra siguroi se do ta dhurojë për bamirësi të gjithë shifrën që do të marrë në Sanremo: “Unë jam këtu sepse dua t’i jap Italisë diçka jo vetëm duke luajtur futboll”.
Më pas kampioni foli edhe për polemikat me LeBron James:
“Ne sportistët bashkojmë botën, politika ndan botën. Atletët duhet të jenë atletë, politikanët duhet të jenë politikanë. Në sportin tim ka sportistë nga e gjithë bota dhe të gjithë janë të mirëpritur. Ne jemi të mirë për të tjera gjëra. Ky është mesazhi im. Askush nuk synonte racizmin”.
Pastaj ai u kthehet thashethemeve për pjesëmarrjen e tij në Sanremo 2021.
“Unë nuk mendoj për polemika. Unë jam një profesionist dhe kur luaj futboll jam shumë i përqendruar. Unë dua t’i jap Italisë atë që ajo më dha, jo vetëm në futboll. Kur më ofruan pjesëmarrjen në Festival pyeta dhe më thanë se ‘është gjëja më e mirë që ka në Itali’, atëherë ta bëjmë. Amadeus më thirri sepse dëshiron të thyejë të gjitha rekordet dhe unë pranova”, përsëriti 39-vjeçari, i cili nuk zbuloi saktësisht se çfarë do të bëjë në TV.
Ibra më pas komentoi çështjen Schwazer (edhe ky midis të ftuarve të Sanremo 2021):
“Ata më shpjeguan se çfarë ndodhi; mendoj se ai është një person i shkëlqyer me zemër të madhe. Dua ta njoh. Shpresoj të luajmë dhe pak”.
Ibrahimoviç zbuloi se Fiorello dhe Amadeus, tifozë të mëdhenj të Inter-it, po tallen me të këto ditë për shkak të renditjes në Serie A:
“Pa një milanist nuk ka derbi. Ata përsërisin se janë tifozë të Inter-it çdo pesë minuta dhe thonë se janë të parët në renditje, por për gjashtë muajt e parë nuk kam dëgjuar asgjë. Ne do e marrim përsëri vendin e parë”, deklaroi ai.
Në fund Ibra foli edhe për duetin që pritet të bëjë me mikun dhe kolegun e tij Sinisa Mihajloviç. “Unë do të këndoj – Io vagabondo – me Sinisa, shpresojmë që Mihajloviç të mos dijë të këndojë, që të jemi në të njëjtin nivel”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
