“I shiti shpirtin djallit” – Messi, 2030, dhe marrëveshja me Arabinë Saudite

Kupa e Botës 2026 do të mbahet në Shtetet e Bashkuara, Kanada dhe Meksikë, por oferta për edicionin 2030 u hap në qershor të 2022 me fituesin eventual që do të zgjidhet në kongresin e 74-të të FIFA-s në 2024.

Oferta e vetme e konfirmuar deri më tani është një nismë e përbashkët nga Spanja, Portugalia dhe Ukraina. Megjithatë, dy propozime rivale do të dalin zyrtarisht.

Njëri do të jetë nga Amerika e Jugut, i përbërë nga Argjentina, Uruguai, Paraguaj dhe Kili. Tjetri do të jetë një përpjekje e kombinuar nga Arabia Saudite, Egjipti dhe Greqia.

Përdorimi i shumë vendeve brenda ofertave shpjegohet me faktin se finalet e Kupës së Botës do të bëhen një garë me 48 ekipe nga viti 2026.

“Një ofertë e Amerikës së Jugut për vitin 2030 është shumë e fortë”, tha koordinatori i saj Fernando Marin për “The Athletic”. “Rajoni është një gjenerues i talenteve që shprehen në të gjithë botën. Për më tepër, në 100-vjetorin e Kupës së parë të Botës në Uruguaj në vitin 1930, do të ishte një vend i përshtatshëm”.

Në vitin 1930, Uruguai pritës fitoi turneun, duke mundur Argjentinën 4-2 në finale.

Oferta e përbashkët e Amerikës së Jugut u publikua për herë të parë në vitin 2017, kur atëherë bashkëlojtarët e Barcelona-s, Luis Suarez (Uruguai) dhe Lionel Messi (Argjentinë) u bashkuan për të promovuar vendet e tyre. Para një ndeshjeje mes dy kombeve, Suarez kishte veshur një fanellë të Uruguait me numrin 20 në fanellën e tij dhe Messi me atë të Argjentinës me numrin 30.

Marin i tha agjencisë së lajmeve “AFP” se “Messi do të na bashkohet në këtë nismë, dhe Suarez sigurisht. Ne i thamë atij (Messi) për qëllimet tona dhe ai mendon se është e mundur. Ai tregoi dëshirë të madhe për të na ndihmuar. Ai me siguri do të jetë flamurtari për Kupën e Botës”.

Megjithatë, në maj 2022, një zhvillim i ri lindi kur Messi, ndoshta futbollisti më i madh dhe më i famshëm në planet, nënshkroi një marrëveshje fitimprurëse për të promovuar shtetin e Arabisë Saudite.

Gjëja e parë që duhet thënë është se marrëveshja është të promovojë turizmin në atë vend, në vend të një oferte për Kupën e Botës 2030.

Megjithatë, objektivi kombëtar i Arabisë Saudite lidhet me “Vizionin 2030”. Kjo përshkruhet nga literatura qeveritare si “një plan unik transformues i reformës ekonomike dhe sociale që po hap Arabinë Saudite ndaj botës”.

Prandaj, një ofertë për Kupën e Botës për vitin 2030 duket se është shumë e lidhur me vizionin e përgjithshëm dhe promovimi i turizmit ndihmon shumë në këtë kauzë.

Shembuj të tjerë përfshijnë fondin sovran të pasurisë së shtetit PIF që vendosi të blejë klubin anglez të Premier League Newcastle United, si dhe mbështetjen e turneut të shkëputur të LIV Golf, plus një marrëveshje 10-vjeçare, 650 milionë dollarë për të pritur garat e Formula 1 dhe për të organizuar boksin e peshave të rënda 2019 përplasje mes Anthony Joshua dhe Andy Ruiz.

Së fundmi është dhe nënshkrimi i Cristiano Ronaldo-s nga skuadra e Al Nassr për dy vite e gjysmë dhe më pas ai mund të jetë ambasador i sauditëve për Kupën e Botës 2030.

Dennis Horak, ambasadori kanadez në Arabi midis 2015 dhe 2018, shpjegon për “The Athletic” se “E gjithë hapja e sferës së argëtimit dhe sportit është një pjesë e madhe e Vizionit 2030. Me LIV Golf (financuar nga Arabia Saudite) dhe tani me këto llojet e sponsorizimeve të nivelit të lartë si Messi, ata po përpiqen ta çojnë atë në një nivel tjetër dhe ta bëjnë atë më global. Reputacioni i Arabisë Saudite globalisht ka nevojë për një rritje dhe ka të bëjë me përpjekjen për të riemërtuar vendin”.

Kohëzgjatja dhe kushtet e marrëveshjes së Messi-t nuk janë bërë publike.

“Daily Telegraph” raportoi më parë se Ronaldo kishte refuzuar një ofertë me vlerë më shumë se 5 milionë paund në vit për të promovuar turizmin saudit.

Megjithatë, burime të shumta të njohura me funksionimin e roleve ambasadore në rajonin e Gjirit, të cilët donin të mos përmendeshin për të parandaluar pasojat, sugjeruan për “The Athletic” se marrëveshja e Messi-t mund të vlejë deri në pesë herë më shumë se tarifa vjetore që iu ofrua Ronaldo-s.

Kjo bëhet më e besueshme kur marrim parasysh llojet e shifrave që agjencitë saudite kanë derdhur në turneun LIV Golf, për shembull, ku Tiger Woods hodhi poshtë një shifër që raportohej se vlente 700-800 milionë dollarë për t’iu bashkuar turneut.

Përfaqësuesit e Messi-t thanë se nuk mund të sqaronin shifrat e përfshira për shkak të kushteve të konfidencialitetit në marrëveshje.

Sauditët e promovuan fillimisht argjentinasin si ambasadorin e tyre të turizmit për vendin gjatë një udhëtimi në Jeddah, një qytet turistik pranë Detit të Kuq, në maj.

“Kjo nuk është vizita e tij e parë në mbretëri dhe nuk do të jetë e fundit”, tha Ahmed al-Khateeb, ministri saudit i turizmit, në një postim në Twitter që tregonte mirëpritjen e Messi-t në Aeroportin Ndërkombëtar të “Mbreti Abdulaziz”.

Messi më vonë publikoi një foto të tij në një jaht teksa shikonte perëndimin e diellit saudit.

“Duke zbuluar Detin e Kuq #VizitoniSaudit”, lexohet në mbishkrimin në Instagram. Postimi u etiketua si një “partneritet me pagesë” me Visit Saudi, i cili është një filial i Autoritetit Saudit të Turizmit.

Messi më vonë iu bashkua Princeshës Haifa Al-Saud, ndihmës ministre e turizmit, në një turne në Jeddah e vjetër.

“Më vjen mirë që ai u mahnit nga thelbi, trashëgimia dhe bukuria e saj”, shkroi Princesha Haifa në Twitter.

 

View this post on Instagram

 

A post shared by Leo Messi (@leomessi)

Ekipi mbështetës i Messi-t refuzoi të komentojë nëse pozicioni i tij për promovimin e Arabisë mund të bie ndesh me përpjekjet e vendit të tij për të organizuar një Kupë Botërore në vitin 2030, ashtu si ata refuzuan të komentojnë se sa herë ai do të vizitojë vendin nga Gjiri si pjesë e marrëveshjes së tij për të promovuar turizmin.

Më e rëndësishmja, ata refuzuan të komentojnë gatishmërinë e Messi-t për një marrëveshje me një shtet i cili ka qenë i lidhur me abuzimet e të drejtave të njeriut, duke përfshirë vrasjen e gazetarit të “Washington Post”, Jamal Khashoggi, si dhe goditjet ndaj aktivisteve të të drejtave të grave, personave LGBTQ+ dhe ata që flasin kundër sundimit të Princit të Kurorës Mohammed bin Salman (MBS).

Në vitin 2021, organizata humanitare UNICEF raportoi se më shumë se 10 mijë fëmijë ishin vrarë që nga përfshirja e një koalicioni të udhëhequr nga Arabia Saudite në konfliktin në Jemenin fqinj. Messi mbetet një “Ambasador i Vullnetit të Mirë” për UNICEF-in, një post që ai e ka mbajtur që nga viti 2010.

Përfaqësuesit e Messi-t nuk pranuan të komentojnë këtë konflikt të dukshëm, ndërsa UNICEF-i nuk u përgjigj.

Për Messi-n, është një nga partneritetet e panumërta për një lojtar që fiton mbi 30 milionë euro neto për të luajtur për kampionët francezë Paris Saint-Germain, një klub në pronësi të një fondi të lidhur me shtetin e Katarit, i cili është akuzuar për shkelje të të drejtave të njeriut.

Kohët e fundit, Messi ka nënshkruar një marrëveshje prej 20 milionë dollarësh për të promovuar firmën e kriptove, “Socios”, ndërsa ai është gjithashtu një fytyrë e lojës “Sorare” me bazë NFT.

Ai gjithashtu ka rënë dakord për marrëveshje sponsorizimi me “Adidas”, “Pepsi”, “Budweiser”, “Ooredoo”, “Pro Evolution Soccer”, “Louis Vuitton”, kompaninë izraelite “Orcam”, “Dubai Expo 2020”, shfaqjen e tij “Cirque du Soleil” dhe kompaninë kineze të qumështit “Mengniu”.

Në maj 2022, uebsajti i biznesit Forbes vlerësoi se Messi kishte fituar më shumë se 120 milionë dollarë gjatë vitit të kaluar.

Në vitin 2012, Messi vizitoi Arabinë Saudite për herë të parë.

Kur fluturimi i tij u ul, buja dhe rojet e sigurisë ishin aq intensiv sa që njëri prej tyre që e shoqëronte atë mes turmave i drejtoi aksidentalisht tytën e armës drejt fytyrës.

Që atëherë, marrëdhënia është bërë më komode, dhe për shkak të një figure të quajtur Turki Al-Sheikh.

Al-Sheikh është kryetar i Autoritetit të Përgjithshëm të Argëtimit Saudit, i cili synon të promovojë rritjen sociale dhe ekonomike në vend.

Në maj 2020, Messi i dërgoi një mesazh në internet Al-Sheikh, i cili është një politikan i shquar saudit dhe gjithashtu pronar i klubit spanjoll të futbollit në La Liga Almeria.

Rasti ishte kur Al-Sheikh po luante në një ndeshje futbolli bamirësie të “PlayStation” kundër Saud Al-Suwailem, ish-presidenti i klubit saudit të futbollit Al-Nasr. Me këtë të fundit aktualisht aktivizohet Ronaldo, siç u përmend edhe më sipër.

Messi ishte në mesin e një kasti me emra të profilit të lartë, së bashku me Diego Maradona, ish-yjet e Brazilit Cafu, Roberto Carlos dhe Ronaldinho, mbrojtësi italian Leonardo Bonucci dhe ish-holandezi Patrick Kluivert, të cilët dërguan mesazhe duke publikuar një lojë që synonte të mblidhte fonde për njerëzit në nevojë në Arabinë Saudite.

Mesazhe kanë dërguar edhe aktorë të njohur si Charlie Sheen, por edhe reperi Snoop Dogg.

Ndërkohë, Al-Sheikh është një ish-roje sigurie për MBS, i cili u miqësua aq shumë me Princin e Kurorës sa u lejua të drejtonte Komisionin e Sporteve Saudite.

Ndërsa drejtonte Komisionin e Sporteve Saudite, Al-Sheikh u bë një bashkëbisedues kyç për ata që dëshironin të merrnin para nga paratë e disponueshme në Arabi. Ai ishte përgjegjës për organizimin e një ndeshjeje mes Brazilit dhe Argjentinës atje në vitin 2019, ku klubi i tij i futbollit, Almeria, publikoi një video në rrjetet sociale të Messi-t dhe Al-Sheikh-ut të përqafuar në tunel para ndeshjes me mbishkrimin “dy luanë”.

Messi gjithashtu uroi publikisht Al-Sheikh-un për ditëlindjen e tij të 40-të, dhe ai ka vizituar më parë shtëpinë e politikanit në Riad me lojtarë të tjerë të Argjentinës.

Si pjesë e rolit të tij si kryetar i Autoritetit të Përgjithshëm të Argëtimit, Al-Sheikh siguroi gjithashtu që Messi të reklamonte sezonin e Riadit për 2022 (një festival argëtimi) në billborde që u shfaqën në Londër, Dubai dhe Newcastle. Një video tjetër e Messi-t duke promovuar sezonin e Riadit me një fanellë të PSG-së u shfaq gjithashtu.

Është veçanërisht interesante pasi, për një kohë të gjatë, marrëdhënia midis Arabisë Saudite dhe Katarit (kombi i lidhur me PSG) kishte qenë e tensionuar për shkak të një bllokadë të Katarit nga fqinjët e tij.

Al-Sheikh ishte në qendër të sulmeve ndaj Katarit, pasi ai madje sugjeroi në Twitter në një rast se Kupa e Botës 2022 duhet të zhvendoset në Angli ose SHBA nëse Katari pritës shpallet fajtor për shkelje etike.

Megjithatë, kontrata e Messi-t me PSG-në e lejon atë të pajtohet me çfarëdo marrëveshjeje tregtare që ai dëshiron.

Viti 2021 ka parë një përmrmirësim në marrëdhëniet midis Arabisë Saudite dhe Katarit, në atë masë që MBS dhe Emiri i Katarit, Sheikh Tamim bin Hamad Al Thani, ishin ulur së bashku me kreun e FIFA-s, Gianni Infantino, gjatë ndeshjes hapëse të Kupës së Botës.

Në ekranet televizive, reklamat e Messi-t që promovon udhëtime në Arabinë Saudite transmetohen tani në televizionin e Katarit.

Shpresat saudite u ngritën edhe një herë kur MBS u ul pranë Infantino-s në ndeshjen e Kupës së Botës, ndërsa dyshja u panë gjithashtu duke u shoqëruar së bashku në Bali në samitin e G20 gjatë nëntorit 2022. Ata kanë parë së bashku edhe ndeshje boksi më parë.

Burime pranë shtetit saudit, të cilët donin të mos përmendeshin për të mbrojtur marrëdhëniet e biznesit, ndiejnë një besim në rritje se oferta e tyre për Kupën e Botës 2030 do të jetë opsioni i preferuar.

Sauditët kanë paraqitur gjithashtu një ofertë për të pritur Ekspozitën Botërore 2030, duke nënvizuar më tej dëshirën e tyre për ta bërë Visionin 2030 kulmin e planit të tyre të madh.

Në bisedat me figura të shquara argjentinase, shndrit shqetësimi për të kritikuar Messi-n. I pyetur nëse duket e çuditshme që Messi po ndihmon për të shëruar imazhin e një rivali për të drejtën e organizimit të Kupës së Botës 2030, ish-bashkëlojtari i tij ndërkombëtar Maxi Rodriguez tha se “Po, sinqerisht, por mirë… ju nuk e dini se çfarë mund të përfundojë duke ndodhur. Ju dëshironi që Kupa e Botës të jetë në oborrin tuaj”.

“Por ka shumë për të bërë, sepse nuk është e lehtë të jesh mikpritës i një Kupe Botërore. Do të shohim se çfarë do të ndodhë kur të zgjidhet pritësi për turneun. Si argjentinas do të donim ta përjetonim sërish në vendin tonë”, theksoi ai.

Fernando Marin, koordinator i ofertës së përbashkët të Amerikës së Jugut që përfshin Argjentinën, tha se “Messi ka një fuqi unike brenda dhe jashtë fushës. Ai është rritur në një mënyrë superlative. Messi është një markë më vete dhe shumë e fuqishme. Ai është një markë për të gjithë futbollin, jo për shtetet. Ai do të jetë një pjesë themelore e një oferte të Amerikës së Jugut për vitin 2030”.

Megjithatë, ai gjithashtu duket të jetë një pjesë themelore e ambicieve të rivalëve të tyre për vitin 2030.

Për më tepër, sipas lajmeve më të fundit, pas mbërritjes së Ronaldo-s në Arabi, Messi mund të shkojë pas tij. Mediat spanjolle kanë raportuar së fundmi se dy klube saudite janë pas argjentinasit.

Al-Hilal dhe Al-Ittihad janë të gatshme të mbulojnë me ar Messi-n, duke i propozuar një kontratë me 306 milionë paund në sezon. Ronaldo përfiton 174 milionë paund në vit.

Çfarë do të ndodh mbetet të shihet, por nëse Messi përfunon duke luajtur në Arabi, atëherë shpresat që ai të mbështes ofertën e Amerikës së Jugut për Kupën e Botës 2030 do të veniteshin.

Marrë nga “The Athletic”, përshtatur për Albanian Post. 

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com