Dënohet një kosovar me pesë vjet burgim për pjesëmarrje në luftën në Siri

Gjykata Themelore në Prishtinë ka dënuar me pesë vjet burgim një shtetas të Kosovës për pjesëmarrje në luftën në Siri.

Nga Gjykata është thënë se i akuzuari Y.B, u gjet fajtor për veprën penale “Organizim dhe pjesëmarrje në grup terrorist”, por ka hedhur poshtë akuzën për “Lehtësim dhe financim në kryerjen e terrorizmit”.

Y.B më 2013, kishte udhëtuar nga Aeroporti Ndërkombëtar i Prishtinës “Adem Jashari” për në Turqi dhe më pas drejt Sirisë, “dhe ka ka filluar ushtrimet ushtarake më qëllim që të marrë pjesë në luftime në kuadër të organizatës terroriste Abal-al-Nusra ‘Daela-Islamia’, e cila më vonë është njohur si grupi militant Shteti Islamik”.

I njëjti sipas këtij institucioni kishte qëndruar në Siri deri më 28 maj 2022, kur është kthyer në Kosovë.

Më 28 maj të vitit 2022, Kosova dhe Shqipëria, riatdhesuan 15 shtetas të tyre.

Ky operacion ishte mbështetur nga Shtetet e Bashkuara të Amerikës, në Prishtinë ishin atdhesuar dy.

Sipas Gjykatës Themelore, të akuzuarit do t’i llogaritet koha e qëndruar në paraburgim, ndërkaq të drejtë ankese për këtë aktgjykim palët kanë në Gjykatën e Apelit.

Më 2015, Kosova ka miratuar një ligj të posaçëm që sanksionon pjesëmarrjen në luftërat e huaja, ku parashihen dënime deri në 15 vjet burgim.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.