CAS merr vendimin për Leao-n

Gjykata e Arbitrazhit Sportiv (CAS) thuhet se ka marrë vendim mbi çështjen e futbollistit të Milan-it, Rafael Leao.

Sipas asaj që raporton “Football Italia”, Leao nuk do të jetë përgjegjës për të paguar dëmshpërblimin që pretendonte skuadra portugeze, Sporting Lisbona.

Leao ndërpreu kontratën e tij me Sporting-un në vitin 2018, duke iu bashkuar francezëve të Lille si një transferim i lirë disa muaj më vonë.

Ai më pas kompletoi transferimin e tij te Milan-i për shumën e 29 milionë eurove në vitin 2019, për të cilin klubi i Sporting-ut thotë se ata nuk kishin dhënë dritën jeshile për këtë transferim, për të cilin paditën futbollistin në fjalë dhe klubin nga Franca.

Gjatë marsit të vitit 2020, 22 vjeçari u urdhërua që të paguante një dëmshpërblim prej 16.5 milionë euro nga Gjykata e Apelit të Lisbonës.

Madje klubi i Sporting-ut kishte kërkuar që të paguhej e gjithë klauzola e lirimit të Leao-s, e cila ishte 40 milionë euro.

Megjithatë, Leao ka marrë një lajm të mirë nga Gjykata e Arbitrazhit Sportiv (CAS), e cila ka urdhëruar skuadrën e Lille të dëmshpërblejë Sportingu-n.

Sipas raportit, kampionët francezë janë urdhëruar të paguajnë 20 milionë euro, përfshirë interesat, për nënshkrimin e anësorit portugez në vitin 2018.

Nga kjo situatë, tani Leao mund të rinovojë kontratën e tij me klubin e Milan-it, e cila kishte ngecur pikërisht për këtë çështje.

Kontrata aktuale e tij me kuqezinjtë mbaron në verën e vitit 2024, por drejtuesit e klubit të Milan-it, ashtu sikurse edhe vet futbollisti dëshirojnë të vazhdojnë bashkëpunimin deri në vitin 2026, me një pagë dukshëm më të lartë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.