Akuzohet për shkaktim të aksidentit me pesë persona të vdekur, i pandehuri nuk e pranon fajin

Pas leximit të aktakuzës për Erton Musliu, që akuzohet për shkaktimin e një aksident me pasoj vdekjen e pesë personave, është deklaruar i pafajshëm.

Muajin qershor të këtij viti në fshatin Koshare të Ferizajt, në një aksident trafiku kishin mbetur të vdekur pesë persona, ku procesi i gjykimit ndaj Musliut ka nisur këtë të martë, në Gjykatën Themelore të Ferizajt.

Prokurori Shukri Jashari ka propozuar që i pandehuri të mbahet në paraburgim, duke i dhënë edhe arsyet.

“Pas shqyrtimit të detajuar dhe mbarimit të hetimeve për rastin konkret, kemi vlerësuar se nuk kemi të bëjmë me vepër penale nga pakujdesia, por kemi të bëjmë me veprën penale me dashje eventuale” ka thënë prokurori Jashari.

Gjithashtu prokurori po konsideron që duke pasur parasysh peshën e kësaj vepre penale, po ashtu mënyrën e kryerjes së kësaj vepre dhe pasojat tejet të rënda që ka shkaktuar, ekziston rreziku se i njëjti mund të arratiset, duke penguar kështu zhvillimin e mëtutjeshëm të procedurës penale në këtë çështje.

Mirëpo, avokati i të akuzuarit, Tomë Gashi, ka qenë kundër propozimit të prokurorit.

Ndërsa lidhur me deklarimin e të akuzuarit rreth fajësisë tha se të njëjtit gjatë shqyrtimeve gjyqësore të radhës do t‘i jepet mundësia që prapë të deklarohet rreth fajësisë.

Gjyqtarja e çështjes, Kadrie Goga Lubishtani, njoftoi se lidhur me propozimin e prokurorit do të vendoset me aktvendim të veçantë, ndërsa seanca e radhës u shty për kohë të pacaktuar.

Ndryshe, aktakuza ndaj Erton Musliut është përpiluar më 29 shtator 2021.Sipas aktakuzës së siguruar nga “Betimi për Drejtësi”, më 6 qershor 2021, rreth orës 15:37, në rrugën magjistrale Ferizaj-Shtime, saktësisht në fshatin Koshare të Komunës së Ferizajt, i pandehuri duke drejtuar automjetin të markës “Audi A8”, me të arritur përballë firmës “LS Qeramika”, me dashje eventuale shkel nenin 53, paragtafin 1, të Ligjit për rregullat e trafikut rrugor.

Aty thuhet se duke mos ia përshtatur shpejtësinë e lëvizjes kushteve të rrugës në vendbanim, si dhe duke mos i respektuar rregullat e komunikacionit, kishte tejkaluar në vijë të plotë dhe kishte kaluar ne shiritin e majtë rrugor, me ç’rast më pjesën e përparme të automjetit e godet automjetin e tipit “Golf II” në pjesën e përparme të anës së majtë, i cili automjet ishte duke lëvizur nga drejtimi i kundërt Shtime-Ferizaj.

Në aktin akuzues thuhet se në këtë aksident, në vendin e ngjarjes ndërrojnë jetë N.R., Xh.R., S.R. dhe i mituri Y.R., kurse I.R. ndërron jetë më pas në QKUK në Prishtinë. Gjithashtu, thuhet se L.H. përson lëndime të rënda trupore, kurse Y.H. lëndime të lehta.

Me këtë, Erton Musliu akuzohet se ka kryer veprën penale “Rrezikimi i trafikut publik” nga neni 370, paragrafi 5, lidhur me paragrafin 1 të Kodit Penal, kryesi i së cilës dënohet me burgim prej tre deri në dymbëdhjetë vjet.

Ndryshe, nga 6 qershori e deri më 25 shtator Musliu ka qëndruar në paraburgim, kurse nga 25 shtatori e deri më 25 tetor atij i është caktuar masa e arrestit shtëpiak.

Për masën e arrestit shtëpiak gjatë ditës së premte në qytetin e Shtimës, ishte mbajtur një protestë paqësore duke kërkuar drejtësi për anëtarët e familjes Ramadani.

Protesta ishte zhvilluara pas kërkesës së prokurorit dhe aprovimit nga ana e gjykatës për lirimin në arrest shtëpiak të personit që dyshohet se shkaktoi aksidentin ku mbetën të vdekur fillimisht katër anëtarët, e më pas edhe anëtari i pestë i kësaj familje.

Protestuesit kishin mbajtur pankarta ku shkruhej “Ministre ku je”, “Po drejtësi, jo korrupsion”, e tjera pankarta.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.