Aktakuzë ndaj dy drejtorëve të Komunës së Deçanit

Prokuroria Themelore në Pejë, këtë të mërkurë, ka ngritur aktakuzë kundër tre zyrtarëve të komunës së Deçanit, për keqpërdorim të detyrës zyrtare.

Një gjë e tillë është bërë e ditur përmes një njoftimi për media.

Në njoftimin e lëshuar për media thuhet se i pandehuri me iniciale R.H. në cilësinë e drejtorit të Urbanizmit dhe Mbrojtje të Mjedisit në komunën e Deçanit ka lëshuar leje ndërtimi në kundërshtim me ligjin, ndërsa dy të pandehurit e tjerë njëri Drejtor i Inspektoratit dhe tjetri inspektor në këtë komunë, nuk kanë bërë inspektimet e duhura dhe rrjedhimisht kanë dhënë leje për një ndërtim i cili nuk i ka plotësuar kushtet ligjore.

“I pandehuri, R.H., në cilësinë e drejtorit të Urbanizmit dhe Mbrojtje të Mjedisit në komunën e Deçanit, në katër raste të ndara, duke tejkaluar kompetencat e tij sipas detyrës zyrtare, ka lëshuar leje ndërtimi në kundërshtim me ligjet përkatëse, që sipas aktakuzës, ka kryer veprën penale ‘Keqpërdorimi i detyrës zyrtare apo autoritetit zyrtar’”.

“Ndërsa, të pandehurit, H.T. në cilësinë e drejtorit të Inspektoratit në komunën e Deçanit dhe i pandehuri, J.H, si person zyrtar në pozitën e shefit të sektorit për inspektim në këtë komunën, nuk ndërmarrin veprimet e nevojshme për të zbatuar inspektimin sipas autorizimeve dhe obligimeve të tyre ligjore, duke lejuar mbindërtimin e tri kateve të një objekti, me ç’rast kanë kryer veprën penale “Keqpërdorimi i detyrës zyrtare apo autoritetit zyrtar’”, thuhet në njoftim.

Prokurori i çështjes me rastin e ngritjes se aktakuzës, i ka propozuar Gjykatës që të pandehurit të shpallën fajtor dhe të dënohen sipas ligjit për veprat penale të cila ju vihet në barrë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.