Administrata Biden dërgoi gjeneralë për të këshilluar IDF-në përpara ofensivës tokësore në Gaza

Administrata Biden dërgoi kohët e fundit një gjeneral marins me tre yje dhe disa oficerë të tjerë ushtarakë amerikanë në Izrael për të ndihmuar në këshillimin e udhëheqjes së ushtrisë izraelite në operacionin e saj në Gaza.

Masa pasqyron përfshirjen e thellë të administratës Biden në luftën në Gaza dhe sa vizibilitet ka ajo në planifikimin ushtarak të Izraelit.

Lajmi u bë i ditur nga “Walla News” dhe “Axios”, duke cituar dy zyrtarë të lartë amerikanë dhe dy zyrtarë të lartë izraelitë.

Oficerët e Korpusit Detar të dërguar përfshijnë gjeneral-lejtant James Glynn, sipas një zyrtari të lartë izraelit.

Glynn më parë drejtoi operacionet speciale të marinsave dhe ishte i përfshirë në operacionet kundër ISIS-it në Irak.

Glynn dhe oficerët e tjerë ushtarakë amerikanë nuk po drejtojnë operacionet, por ata ofrojnë këshilla ushtarake për IDF-në për planet e saj në Gaza, shkruan Axios.

Kjo ka qenë e fokusuar kryesisht në pushtimin tokësor të pritshëm të Izraelit.

Oficerët amerikanë kanë ndarë mësimet që SHBA-të kanë mësuar nga luftimi i ISIS-it në Mosul.

Glynn nuk pritet të qëndrojë në Izrael për të ndjekur pushtimin tokësor të IDF-së, thanë burime me njohuri të drejtpërdrejta për këtë çështje.

“Ne u kemi kërkuar disa zyrtarëve me përvojë përkatëse, thjesht për të ndihmuar zyrtarët izraelitë të mendojnë për çështjet e vështira përpara dhe të shqyrtojnë opsionet e tyre. IDF, si gjithmonë, do të marrë vendimet e veta”, i tha Axios një zëdhënës i Pentagonit.

Sekretari Amerikan i Shtetit Antony Blinken dhe Sekretari amerikan i Mbrojtjes Lloyd Austin thanë të dielën se Shtetet e Bashkuara presin që lufta Izrael-Hamas të përshkallëzohet përmes përfshirjes nga përfaqësuesit e Iranit dhe ata pohuan se administrata Biden është e përgatitur të përgjigjet nëse personeli amerikan ose forcat e armatosura bëhen objektiv i ndonjë armiqësie të tillë.

“Kjo nuk është ajo që duam, nuk është ajo që po kërkojmë. Ne nuk duam përshkallëzim”, tha Blinken. “Ne nuk duam t’i shohim forcat ose personelin tonë të sulmohen. Por nëse kjo ndodh, ne jemi gati”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.