Zemaj: Kurti përgjegjës për rastin e foshnjës në Spitalin e Pejës

Ish-ministri i Shëndetësisë, Armend Zemaj, ka kërkuar dënimin dhe shkarkimin e të gjithë personave që janë përfshirë në ngjarjen që ndodhi në Spitalin e Përgjithshëm të Pejës ku një foshnje e porsalindur pa shenja jete është futur bashkë me çarçafë në një lavatriçe.

Sipas Zemaj, ky rast tregon për paaftësinë e ekzekutivit për të menaxhuar me sektorin e shëndetësisë.

“Rasti i supozuar i ka kaluar të gjitha masat. Duhet të shkarkohen dhe të dënohen të gjithë ata që janë të përfshirë në rast si dhe ata që e kanë fshehur, akoma më keq ky rast është munduar që të mbahen i fshehur nga pushteti për tetë ditë me radhë”.

“Se paaftësia e qeverisjes në shëndetësi e kemi thënë gjithmonë, mirëpo rasti i foshnjës shkon përtej. Jo shumë ditë nga sot u vra edhe një nënë, që shkoi për të lindur”, ka thënë Zemaj në konferencë për media.

Ai tutje ka thënë se 300 mjekë e kanë lëshuar vendin këto 2 vjet dhe vetëm një përqindje shumë e ulët është shfrytëzuar për shëndetësi.

“Përgjegjës është Kurti si i vetëemëruar, ministër i Shëndetësisë. Dorëheqje morale atyre që nuk janë drejtpërdrejtë. Kemi më shumë se 300 mjekë që kanë ikur në këto 2 vite. Vetëm 5% e buxhetit për investime kapitale është shfrytëzuar në shëndetësi”.

“Ky sektor ka arritur kulmin e dëmtimit”.

Zemaj kërkoi që pas këtij dështimi kryeministri së paku ta emëroj një ministër të shëndetësisë.

Edhe, Shoqata e të Drejtave të Pacientëve në Kosovë (PRAK), ka reaguar ndaj ngjarjes në Spitalin e Përgjithshëm të Pejës ku një foshnje e porsalindur pa shenja jete është futur bashkë me çarçafë në një lavatriçe.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.