Volker Turk bën thirrje për zgjerim të operacioneve, ndërsa vdekjet e refugjatëve janë në rritje

Shefi i OKB-së për të drejtat e njeriut ka bërë thirrje për një zgjerim të operacioneve të kërkim-shpëtimit pas një rritje të numrit të refugjatëve dhe azilkërkuesve që bëjnë përpjekje të rrezikshme për të kaluar Mesdheun Qendror për në Evropë.

“Ne po shohim një rritje të madhe të numrit të njerëzve të dëshpëruar që vënë jetën e tyre në rrezik të madh”, tha Komisioneri i Lartë i OKB-së për të Drejtat e Njeriut Volker Turk në një deklaratë të enjten.

“Ne nuk mund të lejojmë të anashkalojmë dhe të përfshihemi në një debat tjetër se kush është përgjegjës”.

Turk bëri thirrje gjithashtu për solidaritet me Italinë, e cila tradicionalisht ka pranuar shumicën e mbërritjeve, duke shtuar se roja bregdetare italiane kishte shpëtuar rreth 2 mijë njerëz në rrugë që nga e premtja.

Qeveria e krahut të djathtë të Italisë këtë javë vendosi një gjendje të jashtëzakonshme gjashtëmujore për t’u marrë me situatën.

“Jetët e njerëzve janë në rrezik”, tha ai, ndërsa i kërkoi gjithashtu qeverisë italiane të anulojë një ligj të miratuar këtë vit që kufizonte operacionet e kërkim-shpëtimit të civilëve.

Apeli erdhi një ditë pasi agjencia e migracionit e OKB-së tha se më shumë se 400 njerëz ishin mbytur në Mesdheun Qendror gjatë tre muajve të parë të vitit, ndërsa një numër në rritje i njerëzve përpiqen të arrijnë në Evropë përmes Mesdheut.

Organizata Ndërkombëtare për Migracionin (IOM) njoftoi të mërkurën se numri i raportuar i personave të vdekur dhe të zhdukur përgjatë Mesdheut qendror arriti nivelin më të lartë të çdo tremujori të parë që nga viti 2017 në tre muajt e parë të këtij viti.

IOM dokumentoi 441 vdekje refugjatësh përgjatë rrugës gjatë janarit, shkurtit dhe marsit 2023, krahasuar me 742 në 2017 dhe 446 në 2015.

“Kriza e vazhdueshme humanitare në Mesdheun qendror është e patolerueshme”, tha kreu i IOM-it, Antonio Vitorino, duke bërë thirrje për më shumë operacione kërkim-shpëtimi nga autoritetet shtetërore.

Agjencia kufitare e Bashkimit Evropian Frontex tha se tre herë më shumë njerëz kërkuan të arrinin në BE përmes Mesdheut në tre muajt e parë të 2023 krahasuar me një vit më parë.

Frontex raportoi 54 mijë kalime “të parregullta” në bllok përmes të gjitha rrugëve në tremujorin e parë të vitit, një e pesta më shumë nga viti 2022.

“Rruga e Mesdheut Qendror përbën më shumë se gjysmën e të gjitha kalimeve të parregullta kufitare në BE”, tha Frontex në një deklaratë të mërkurën, duke shtuar se rreth 28 mijë njerëz kishin mbërritur në atë mënyrë nga fillimi i vitit deri në fund të marsit, tre herë më shumë se në të njëjtën periudhë të vitit 2022.

“Grupet e krimit të organizuar përfituan nga moti më i mirë dhe paqëndrueshmëria politike në disa vende të nisjes për të tentuar të kontrabandojnë sa më shumë njerëz të jetë e mundur nëpër Mesdheun Qendror nga Tunizia dhe Libia”.

Qeveria italiane shpalli të mërkurën një gjendje të jashtëzakonshme pas një “rritjeje të mprehtë” të mbërritjeve në të gjithë Mesdheun, një veprim që do t’i lejojë asaj të kthejë refugjatët më shpejt.

Roma i ka kërkuar BE-së të bëjë më shumë për të ndaluar mbërritjet në det, shembulli më i fundit sesi kalimet e refugjatëve janë kthyer në krye të agjendës politike të bllokut ndërsa lëvizshmëria globale u rrit vitin e kaluar nga nivelet më të ulëta të pandemisë COVID.

Gjithashtu të enjten, Federata Ndërkombëtare e Shoqatave të Kryqit të Kuq dhe Gjysmëhënës së Kuqe tha se po rritte ndihmën humanitare dhe shërbimet e mbrojtjes përgjatë rrugës – duke përfshirë mbështetjen psikologjike, ndihmën e parë, shërbimet e bashkimit familjar dhe ndihmën për zbarkimin në Itali.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.