Vijojnë goditjet ekonomike në Rusi, edhe Pepsi pezullon aktivitetin

“PepsiCo Inc”, korporata shumëkombëshe e ushqimit dhe pijeve, sapo ka njoftuar se do të pezullojë gjithashtu të gjitha shitjet në Rusi duke iu bashkuar një numri kompanish perëndimore që kanë njoftuar vendime të ngjashme sot.

Kompania do të pezullojë të gjitha investimet kapitale, reklamat dhe aktivitetet promovuese në Rusi dhe do të ndalojë operacionet në Ukrainë për të lejuar bashkëpunëtorët të kërkojnë siguri ndërsa lufta në vend përshkallëzohet.

Njoftimi nga “PepsiCo” vjen pas një raporti të mëparshëm nga “Wall Street Journal” sot se zyrtarët e “PepsiCo” po punonin për të parë se si mund të shmangnin një pezullim të biznesit në vend pavarësisht njoftimeve nga “McDonald’s”, “Starbucks” dhe së fundmi, “Coca-Cola” se ata do të pezullonin.

Kompanitë e mëdha perëndimore janë nën presion në rritje për t’u tërhequr nga vendi në përgjigje të pushtimit rus të Ukrainës.

Të ardhurat nga njësia ruse e “PepsiCo” ishin 3.4 miliardë dollarë në vitin 2021 – një rënie prej 30% nga kulmi i saj prej 4.9 miliardë dollarësh në vitin 2013 – duke e bërë atë tregun e tretë më të madh për kompaninë pas SHBA-ve dhe Meksikës. Ndikimi i shlyerjes së njësisë ruse do të ishte minimal sepse kontribuon pak në të ardhurat e “PepsiCo”, thanë disa nga njerëzit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.