Mjekët kanë kryer transplantin e parë të një veshke të modifikuar gjenetikisht nga një derr në një njeri të gjallë.
Operacioni katërorësh u krye Spitalin e Përgjithshëm të Masaçusets, i cili ishte gjithashtu spitali i parë që kreu transplantin e veshkave në vitin 1954.
Pacienti, Rick Slayman, një menaxher 62-vjeç i cili ishte diagnostikuar me sëmundje të veshkave në fazën përfundimtare, po shërohet mirë dhe pritet të dalë së shpejti nga spitali, shkruan CNN, transmeton AlbanianPost.
Mjekët thanë se ata mendonin se veshka e tij e re mund të zgjasë vite, por gjithashtu pranuan se ka shumë të panjohura në transplantet nga kafsha te njeriu.
Në një deklaratë me shkrim të ofruar nga spitali, Slayman tha se ai kishte qenë pacient në programin e transplantit të spitalit për 11 vjet.
Ai më parë mori një veshkë nga një dhurues njerëzor në vitin 2018, pasi jetoi me diabet dhe presion të lartë të gjakut për shumë vite.
Ajo veshkë filloi të shfaqte shenja dështimi pesë vjet më vonë, dhe ai rifilloi dializën në vitin 2023.
Kur ai u diagnostikua me sëmundje të veshkave në fazën përfundimtare vitin e kaluar, tha ai, mjekët e tij i sugjeruan që të provonte një veshkë derri.
“E pashë jo vetëm si një mënyrë për të më ndihmuar, por një mënyrë për të dhënë shpresë për mijëra njerëz që kanë nevojë për një transplant për të mbijetuar”, tha Slayman në deklaratë.
Mjekët që nuk ishin të përfshirë në këtë rast thanë se operacioni përfaqësonte një moment historik të rëndësishëm mjekësor.
“Të shohësh përfundimisht këtë të realizohet pas vitesh pune dhe bashkëpunimi është me të vërtetë një hap i madh përpara dhe një moment i madh për transplantim”, doktoresha Parsia Vagefi, shefe e transplantit kirurgjik në Qendrën Mjekësore UT Southwestern në Dallas.
“Veshka më e bukur që kam parë ndonjëherë”, shtoi ajo.
Doktori Tatsuo Kawai, drejtor i Qendrës Legorreta për Tolerancën Klinike të Transplantit dhe kirurgu që kreu operacionin, tha se organi i derrit ishte saktësisht i njëjtë me madhësinë e veshkës së njeriut.
Kur ata e qepën atë, duke lidhur enët e gjakut me ato të Slayman, tha Kawai, ajo menjëherë “u funksioni” dhe filloi të prodhonte urinë.
Ekipi prej 15 anëtarësh i transplantit në sallën e operacionit shpërtheu në duartrokitje, tha ai.
“Ishte me të vërtetë veshka më e bukur që kam parë ndonjëherë”, tha Kawai në një konferencë shtypi që ishte emocionale për mjekët e përfshirë, disa prej të cilëve kanë punuar në këtë hulumtim gjatë gjithë karrierës së tyre.
Nevoja për organe është shumë më e madhe se numri i disponueshëm. Çdo ditë, 17 njerëz në SHBA vdesin duke pritur për një organ, dhe veshkat janë organi me furnizimin më të paktë.
Sipas Rrjetit të Prokurimit dhe Transplantimit të Organeve, rreth 27 mijë veshka u transplantuan në vitin 2023, por gati 89 mijë njerëz ishin në listën e pritjes për këto organe.
Ekspertët thonë se ksenotransplantet – transplantet e organeve të kafshëve te njerëzit – janë vendimtare për zgjidhjen e mungesës së organeve.
“Mund të jetë gjithashtu një përparim i mundshëm në zgjidhjen e një prej problemeve më të vështira në fushën tonë, që është një akses i pabarabartë për pacientët në mundësinë për transplantim të veshkave”, tha doktori Winfred Williams, shef i asociuar i Departamentit të Nefrologjisë.
Ky është transplanti i tretë i një organi derri në një njeri të gjallë.
Dy të parat ishin zemra të transplantuara në njerëz të gjallë të cilëve u kishin mbaruar opsionet e tjera të transplantimit.
Organet u transplantuan sipas rregullave të veçanta që lejojnë përdorimin e terapive eksperimentale për njerëzit në situata veçanërisht të vështira.
Të dy pacientët vdiqën disa javë pasi morën organet e tyre.
Studiuesit në Mass General Brigham thanë se megjithëse përparimi i fundit ishte i rëndësishëm, nevojiten më shumë kërkime – në mënyrë ideale një studim i madh i kryer në shumë spitale – për të kuptuar më mirë se sa efektive mund të jenë transplantet e veshkave të derrit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
