UNESCO rekomandon një kufi moshe për përdorimin e inteligjencës artificiale në shkolla

UNESCO u bëri thirrje qeverive të enjten e 7 shtatorit që të “rregullojnë me shpejtësi” përdorimin e mjeteve të inteligjencës artificiale si chatbot viral ChatGPT në klasa, duke përfshirë kufizimin e përdorimit të tyre për fëmijët më të rritur.

Lajmi u bë i ditur nga agjencia franceze “AFP”.

Në një udhëzues që do të bëhet publik të enjten, Kombet e Bashkuara konsiderojnë se autoritetet publike nuk janë të gatshme të menaxhojnë çështjet etike që lidhen me integrimin e programeve të inteligjencës artificiale në shkolla.

Zëvendësimi i mësuesve me programe të tilla mund të ndikojë në mirëqenien emocionale të fëmijëve dhe t’i lërë ata të prekshëm ndaj manipulimit, paralajmëron organizata me bazë në Paris.

Sipas Drejtoreshës së Përgjithshme të UNESCO-s, Audrey Azoulay, cituar në një deklaratë për shtyp, “Inteligjenca artificiale gjeneruese mund të jetë një mundësi e jashtëzakonshme për zhvillimin njerëzor, por mund të jetë gjithashtu burim dëmtimi”.

“Nuk mund të integrohet në arsim pa angazhim publik dhe masa dhe rregullore të forta të qeverisë”, shtoi ajo.

Programet gjeneruese të AI të aksesueshme për publikun e gjerë janë shumëfishuar që nga fundi i vitit 2022, kur ChatGPT, i krijuar nga startup-i kalifornian OpenAI, demonstroi aftësinë e tij për të gjeneruar ese, poezi dhe biseda koherente nga pyetje të përmbledhura.

Kjo rritje ka ngritur gjithashtu frikën për format e reja të plagjiaturës ose mashtrimit brenda shkollave dhe universiteteve, pa ulur megjithatë atraktivitetin e një tregu arsimor që konsiderohet potencialisht shumë fitimprurës.

Rekomandimi i UNESCO-s thotë se mjetet e AI kanë potencialin për të ndihmuar fëmijët me nevoja specifike arsimore, për shembull duke krijuar titra, me kusht që mësuesit, përdoruesit dhe studiuesit të ndihmojnë në hartimin e tyre dhe që qeveritë të rregullojnë përdorimin e tyre.

Megjithatë, udhëzuesi nuk rekomandon një moshë minimale për nxënësit e shkollës, por vëren se ChatGPT nuk mund të përdoret, në kushtet e veta, nga fëmijët nën 13 vjeç. Sipas raportit, shumë komentatorë mbrojnë ngritjen e kufirit në 16 vjeç.

UNESCO bën thirrje për ndalimin global të telefonave inteligjentë në shkolla

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.