Thesari Amerikan sanksionon kryeministrin boshnjak Fadil Novaliç

Departamenti i Thesarit Amerikan ka sanksionuar kryeministrin boshnjak Fadil Novaliç dhe një biznesmen të lidhur me udhëheqësin e Republikës Srpska, Milorad Dodik.

Sipas Thesarit Amerikan, në cilësinë e si kryeministër, Novaliç “keqpërdori të dhënat e pensionistëve për të mirën e partisë së tij politike dhe në kundërshtim me ligjin boshnjak”.

Në javën para zgjedhjeve të 2018-ës, Novaliç përdori të dhënat e pensionistëve që kishte marrë përmes pozicionit të tij zyrtar.

Kjo, për të dërguar letra duke renditur arritjet e tij dhe duke premtuar rritje të pensioneve në një vend ku çështja e pensioneve ka një rëndësi të madhe politike.

“Ky veprim shkel ligjin e BiH dhe pasqyron një model më të gjerë, të raportuar publikisht të përdorimit të pozicionit të tij të ndikimit politik për përfitime personale ose partiake, duke minuar proceset ose institucionet demokratike në BiH”, thekson më tej njoftimi.

Novaliç u emërua nga autoritetet amerikane si “përgjegjës ose bashkëpunëtor ose përfshirje direkt ose indirekte në veprime ose politika që minojnë proceset ose institucionet demokratike në Ballkanin Perëndimor”.

Slobodan Stankoviç, një nga individët më të pasur në Bosnjë dhe Hercegovinë, është i sanksionuari i dytë i SHBA-ve.

Ai është pronari prej kohësh i Integral Inzenjering A.D. Laktasi (Integral), një firmë e madhe inxhinierike në Republika Srpska.

Si Stankoviç ashtu edhe Integral kanë qenë të lidhur me korrupsionin në sektorin e ndërtimit.

Në këtë rast, kompania Integral ka përftuar disa nga projektet më të mëdha në RS falë afërsisë me Milorad Dodik.

Projektet e mëdha ndërtimore shpesh i dorëzohen Stankoviç-it pa konkurrencë të drejtë dhe të hapur.

Shumica dërrmuese e pasurisë së Stankoviç-it vjen nga paratë publike, shtoi Thesari.

Sanksionet e reja bllokojnë asetet në pronësi të Novaliç dhe Stankoviç nën juridiksionin e SHBA-ve dhe ndalojnë qytetarët amerikanë nga çdo transaksion me ta.

Shtetet e Bashkuara vendosën gjatë muajit qershor sanksione ndaj presidentit të federatës boshnjako-kroate të Bosnjë-Hercegovinës dhe një zyrtari të entitetit boshnjako-serb, duke i akuzuar ata për kërcënime ndaj institucioneve demokratike të vendit.

Në një deklaratë, Departamenti i Thesarit tha se po vendoste në listën e zezë Marinko Cavara, një anëtar i një partie nacionaliste boshnjako-kroate dhe Alen Seraniç, ministri i shëndetësisë dhe mirëqenies sociale i Republikës Serbe.

SHBA-të lëshuan ​​sanksione të ngjashme kundër liderit serb të Bosnjës Milorad Dodik në janar, duke e akuzuar atë për kërcënim të integritetit territorial të Bosnjë dhe Hercegovinës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.