‘Superkontinenti’ mund ta bëjë Tokën të pabanueshme në 250 milionë vjet

Formimi i një superkontinenti në Tokë mund të zhdukë njerëzit dhe çdo gjitar në 250 milionë vjet, sipas një studimi të fundit.

Zhdukja masive do të shkaktohej kryesisht nga stresi i nxehtësisë si rezultat i aktivitetit më të madh vullkanik që do të vendoste dy herë më shumë dioksid karboni në atmosferë sesa nivelet aktuale, një diell që do të lëshonte më shumë rrezatim dhe shtrirjen e shkretëtirave të brendshme në tropikët.

Superkontinenti Pangea Ultima pritet të marrë formë kur të gjitha kontinentet aktuale të bashkohen së bashku në të ardhmen e largët.

Duke përdorur një model klimatik të Zyrës Met në Mbretërinë e Bashkuar dhe superkompjuterin e Universitetit të Bristol, simulimi siguroi të dhëna tektonike për ngjarjet e kaluara të zhdukjes dhe të dhëna që mund të jenë të dobishme për astronomët që kërkojnë planetë të tjerë të banueshëm.

Në epokën e Pangea Ultima, ekstremet e temperaturës priten të jenë dramatike, me më shumë lagështi se tani përgjatë brigjeve dhe kushte jashtëzakonisht të thata në shkretëtirat e mëdha të brendshme.

Në këtë botë, temperaturat globale mund të rriten 15 gradë Celsius mbi nivelet para-industriale, gjë që do ta kthente botën në nxehtësinë ekstreme që kaloi për herë të fundit në epokën Permian-Triasik, 260 milion vjet më parë.

Në atë kohë më shumë se 90 për qind e specieve u zhdukën.

Periudhat e zgjatura të nxehtësisë mbi 40 gradë do të ishin përtej niveleve të tolerancës së shumë formave të jetës.

Gjitarët kanë qenë historia e madhe e suksesit evolucionar në botë, veçanërisht që nga rënia e dinosaurëve gjatë ngjarjes së fundit të madhe të zhdukjes, por aftësia e gjitarëve për t’u përshtatur me nxehtësinë mund të jetë shumë e ngadaltë.

Kjo përfshin njerëzit, të cilët kanë qenë në Tokë për një periudhë relativisht të shkurtër.

Hominidët u shfaqën rreth 6 milionë vjet më parë kur bota ishte një vend shumë më i freskët se sa kishte qenë gjatë periudhës së dinosaurëve.

Paçka se speciet tona janë zhvilluar jashtëzakonisht shpejt, ne do të përballemi me sfida të mëdha në epokën e Pangea Ultima, duke supozuar se do ta kalojmë krizën aktuale klimatike të vetë-shkaktuar dhe zhdukjen masive të specieve të tjera.

Përveç ndikimeve të drejtpërdrejta të nxehtësisë, do të kishte probleme të rënda të furnizimit me ushqim për shkak të kolapsit të bimësisë.

Po ashtu studimi vëren se shumica e bimëve stresohen në temperatura mbi 40 gradë dhe prishen plotësisht nëse ekspozohen në 60 gradë për periudha të gjata.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.