Specialja bastisë vetëm shtëpinë e Sylejman Selimit, me Kuçin diskuton për “shkaqe pune”

Ky lajm është përditësuar

Në mëngjesin e së enjtes, Gjykata Speciale ka filluar me bastisje të radhës. Këtë herë, cak i bastisjes është shtëpia e ish-Komandantit të Përgjithshëm të Ushtrisë Çlirimtare të Kosovës (UÇK), Sylejman Selimi.

Lajmin për bastisjen e shtëpisë së Selimit në lagjen “Veterrnik”, në Prishtinë, për Albanian Post e ka konfirmuar zëdhënësi i Zyrës së Prokurorit të Specializuar (ZPS), Christopher Bennett

“ZPS po kryen operacione të vazhdueshme”, ka thënë shkurtimisht Bennett për AP, në një përgjigje me shkrim.

Nga ZPS-ja nuk kanë dhënë detaje të tjera për arsyet e kësaj bastisje.

Më herët u raportua se bastisje, hetuesit e ZPS-së, janë duke bërë edhe në shtëpinë e ish-Ministrit të Drejtësisë, Hajredin Kuçi, mirëpo i njëjti ka mohuar një gjë të tillë.

“Jo, nuk ka pas bastisje. S’ka pas bastisje, kam pas një kontakt me ta për punën që e bëj atje, por jo as bastisje, as polici as kurrgjë tjetër. Po më vjen keq që e kanë qit lajmin”, ka thënë Kuçi për “Exspress.

Nga ZPS-ja nuk kanë dhënë detaje të tjera për arsyet e këtyre bastisjeve.

Edhe në dhjetor të vitit të kaluar, ZPS kishte bastisur shtëpinë e Behar Shalës, bashkëluftëtarit të ish-komandantit të UÇK-së, Salih Mustafës, i dënuar me nga Gjykata Speciale me 26 vjet burgim për vrasje të paligjshme, ndalim arbitrar dhe torturë.

Po ashtu, në muajin shtator të vitit të kaluar, bastisje u kryen edhe në banesën e familjarëve të dëshmorëve, Fahri e Bahri Fazliu, në Prishtinë, nën arsyetimin se të njëjtët kanë tentuar të ndikojnë në dëshmitarë, derisa procesi gjyqësor ndaj ish-krerëve të Ushtrisë Çlirimtare të Kosovës është duke vazhduar në Hagë.

Ndërsa “cak” kryesor i hetuesve të Speciales për bastisje gjatë vitit të kaluar ishin shtëpitë dhe banesat e ish-këshilltarëve të ish-Presidentit të Kosovës, Hashim Thaçi: Blerim Shalës, Bashkim Smakajt, Artan Behramit, Adil Behramajt dhe Ismajl Sylës, si të dyshuar se “penguan drejtësinë”.

Për këto bastisje ishte pyetur nga Albanian Post kryegjyqtarja e Speciales, Ekaterina Trendafilova më 29 nëntor gjatë një konference për media në Prishtinë, por kjo e fundit kishte kundërshtuar termin “bastisje”, duke sugjeruar të përdoret termi “kontrolle/kërkime”.

“Terminologjia e duhur ligjore është kontrolle/ kërkime, jo bastisje. Nuk ka bastisje. Nuk e di pse gjithandej lexoj për bastisje. Nuk e di nëse do të ketë kontrolle/kërkime [në të ardhmen]. Ndoshta mund të ketë kërkime dhe konfiskime. Kjo ka qenë e pa pritshme edhe për mua”, pati thënë ajo, duke iu referuar bastisjeve të muajve të fundit të ZPS-së në Kosovë.

Ndryshe, Dhomat e Specializuara dhe Zyra e Prokurorit të Specializuar – që ndryshe njihen edhe si Gjykata Speciale – hetojnë krimet e pretenduara të pjesëtarëve të Ushtrisë Çlirimtare të Kosovës.

Më 3 prill të vitit të kaluar në Hagë ka nisur gjykimi ndaj ish-Presidentit të Kosovës, Hashim Thaçi, ish-kreut të Partisë Demokratike të Kosovës, Kadri Veseli, ish-anëtarit të Shtabit të Përgjithshëm të UÇK-së, Rexhep Selimi dhe ish-zëdhënësit të UÇK-së, Jakup Krasniqit, si të akuzuar për krime të pretenduara lufte.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.