SHBA dhe BE mirëpresin miratimin e Ligjit për Zgjedhjet: Shembull i bashkëpunimit me partnerët

Shtetet e Bashkuara të Amerikës dhe Bashkimi Evropian kanë përshëndetur miratimin e Ligjit për Zgjedhjet e Përgjithshme nga deputetët e Parlamentit të Kosovës në seancën e së enjtes.

Përmes një cicërime në rrjetin social në “Twitter”, ambasadori i ShBA-së në Kosovë, Jeffrey Hovenier, tha se ky është një shembull i mirë kur partitë politike në Kosovë bashkëpunojnë me partnerët ndërkombëtar.

“Unë përshëndes miratimin nga Kuvendi të legjislacionit për reformën zgjedhore – një shembull i rezultateve të mira që rezultojnë kur partitë punojnë së bashku dhe me partnerët ndërkombëtarë të Kosovës”, shkroi ai në Twitter.

Tutje, diplomati amerikan theksoi se këto reforma “e harmonizojnë më tej Kosovën me standardet e BE-së dhe forcojnë normat demokratike”.

I applaud the 🇽🇰 Assembly’s passage of electoral reform legislation — an example of the good outcomes that result when parties work together and with Kosovo’s international partners. These reforms further align Kosovo with EU standards and strengthen democratic norms.

— Ambassador Jeff Hovenier (@USAmbKosovo) June 8, 2023

Nga ana tjetër, nga zyra e Bashkimit Evropian në Kosovë, po ashtu përmes një cicërime në Twitter thanë se “mirëpresim miratimin sot nga Kuvendi i Kosovës të Ligjit të ri për Zgjedhjet e Përgjithshme”.

“Të lumtur të shohim që rekomandimet e Misionit të BE-së për Vëzhgimin e Zgjedhjeve janë marrë parasysh. KQZ të përafrojë rregulloren e elektoratit me ligjet e reja dhe të zbatojë kuadrin e ri ligjor përpara zgjedhjeve të reja”, thanë nga BE-ja.

We welcome the adoption of the new Law on General Election by the 🇽🇰 Kosovo Assembly today. Happy to see that the EU EOM recommendations are taken into account. CEC to align the electorate regulations w/the new laws & implement the new legal framework before the new elections.

— European Union in Kosovo (@EUKosovo) June 8, 2023

Ndryshe, Kuvendi i Kosovës në seancën e së enjtes, me 86 vota pro e asnjë kundër, ka miratuar projektligjin për reformën zgjedhore.

Në Ligjin për Zgjedhjet e Përgjithshme janë adresuar rekomandimet e misioneve vëzhguese të Bashkimit Evropian,  Komisionit Qendror të Zgjedhjeve dhe të organizatave të shoqërisë civile.

Ligji për Zgjedhjet e Përgjithshme në Kosovë përcakton rregullat e organizimit të sistemit zgjedhor, duke përfshirë rregullat për përgatitjen, zhvillimin, administrimin, mbikëqyrjen dhe shpalljen e rezultatit të zgjedhjeve për Kuvendin e Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.