Rreth 100 oficerë të CIA-s dhe të afërm të tyre renditen midis 200 zyrtarëve amerikanë të prekur nga Sindroma Havana, tha drejtori i CIA-s, William Burns.
Të enjten e 22 korrikut, në një intervistë në Radion Publike Kombëtare, ai tha se ka forcuar përpjekjet e agjencisë së tij për të përcaktuar shkakun e sindromës dhe përgjegjësin e kësaj situate.
Ai konfirmoi se është përgjuar një oficer i lartë, i cili dikur udhëhoqi misionin për kapjen e Osama bin Laden.
Kjo, për të kryesuar një task forcë që heton sindromën.
Agjencia gjithashtu ka shkurtuar nga tetë javë në dy javë kohën kur njerëzit e lidhur me CIA-n duhet të presin për trajtim në Qendrën Kombëtare Mjekësore Ushtarake Walter Reed.
“Mendoj se është një detyrim i thellë që çdo udhëheqës duhet të ketë ndaj njerëzve të tij dhe kjo është ajo që unë jam i vendosur të bëj”, tha drejtori i CIA-s për NPR-në.
Burns vuri në dukje se një panel i Akademisë Kombëtare të Shkencave të SHBA-ve në dhjetor zbuloi se një teori e besueshme është që rrezet “me energji të drejtuar” shkaktojnë sindromën.
“Ekziston një ‘mundësi shumë e fortë’, që sindroma të shkaktohet qëllimisht dhe se Rusia mund të jetë përgjegjëse”, tha ai, “duke shtuar se ai po pret përfundimet e një hetimi të mëtejshëm”.
Moska mohon përfshirjen.
Çfarë është Sindroma Havana?
Sindroma Havana është një seri simptomash të pashpjegueshme mjekësore të përjetuara për herë të parë nga personeli i Departamentit të Shtetit të SHBA-ve të vendosur në Kubë, duke filluar në fund të vitit 2016.
Asokohe, ata diplomatë ishin dërguar në Kubë, si pjesë e afrimit midis dy vendeve, të nismëtuara nga presidenca Obama, pas dekadash marrëdhëniesh të shkëputura diplomatike midis dy vendeve. Shfaqja e sëmundjeve në tokën kubane i tensionoi diplomatët.
Që nga rastet fillestare, diplomatët dhe oficerët e inteligjencës të vendosur në të gjithë botën kanë përjetuar simptoma të ngjashme. Të prekurit raportojnë një sërë simptomash, si marramendje, dhimbje koke, lodhje, të përziera, ankth, vështirësi konjitive dhe humbje të kujtesës në nivele të ndryshme.
Në disa raste, diplomatët dhe oficerët e inteligjencës kanë lënë shërbimin për shkak të ndërlikimeve.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
