Reporterë dhe aktivistë meksikanë të hakeruar me spyware nga grupi izraelit NSO

Në Meksikë, gazetarët dhe mbrojtësit e të drejtave të njeriut u hakuan duke përdorur spyware të krijuar nga Grupi NSO i Izraelit deri në vitin 2021.

Kjo ka ndodhur paçka se qeveria aktuale e vendit u betua se nuk do të përdorte më software-in e hakerimit.

Sipas një hulumtimi të ri nga R3D dhe The Citizen Lab, viktimat e supozuara përfshijnë dy gazetarë që raportojnë për çështje që lidhen me korrupsionin zyrtar dhe një mbrojtës të shquar të të drejtave të njeriut.

Lajmi është tronditës në dritën e premtimeve politike të presidentit aktual të Meksikës, Andrés Manuel López Obrador, se vendi nuk do të përdorte më spyware.

Deklarata e tij pasoi zbulimet nga “The Guardian” dhe më shumë se një duzinë organizatash të tjera mediatike që raportuan vitin e kaluar se numrat e telefonit të të paktën 50 personave të lidhur me presidentin meksikan ishin përfshirë në një bazë të dhënash të zbuluar në zemër të Projektit Pegasus, një hetim për NSO.

Baza e të dhënave përmbante dhjetëra mijëra numra telefoni të njerëzve që besohet se janë përzgjedhur si persona me interes nga klientët qeveritarë të NSO-së.

Ky lajmi krijoi stuhi pjesërisht sepse numri i jashtëzakonshëm i numrave meksikanë në të dhënat e rrjedhura dukej se minonte pretendimet e NSO-së se hakerimi duhet të përdoret vetëm nga klientët e tij të qeverisë për të luftuar krimin e rëndë dhe terrorizmin.

Meksika ishte vendi i parë në botë që bleu Pegasus dhe software-i operohej nga organe të ndryshme shtetërore, duke përfshirë ministrinë e Mbrojtjes, zyrën e Prokurorit të Përgjithshëm, shërbimin e inteligjencës së sigurisë kombëtare (Cisen).

Sakaq, hulumtimi tregon se abuzimet që përfshijnë Pegasus-in vazhdojnë në Meksikë.

R3D ka thënë se hulumtimi e kishte çuar atë në përfundimin me besim të lartë se mbrojtësi i të drejtave të njeriut Raymundo Ramos ishte hakuar duke përdorur Pegasus-in të paktën tre herë midis gushtit dhe shtatorit 2020.

Po ashtu gazetari Ricardo Raphael, i cili raportohet se ishte shënjestruar dhe hakuar më parë në vitin 2016 dhe 2017 nga një klient qeveritar i NSO-së, u hakerua duke përdorur Pegasus-in tre herë në vitin 2019 dhe një herë në vitin 2020.

R3D ka vënë në dukje se secili nga individët e hakuar ishte me “interes intensiv” për subjektet brenda qeverisë meksikane dhe, në disa raste, kartelet.

“Këto raste të fundit ilustrojnë potencialin e abuzimit të programeve spiun mercenare në një kontekst të përgjegjshmërisë dhe transparencës publike me të meta”, ka thënë Citizen Lab.

NSO ka thënë se baza e të dhënave në zemër të Projektit Pegasus nuk kishte asnjë lidhje me kompaninë izraelite. Ajo gjithashtu ka thënë se nuk ka njohuri se si përdoret spyware-i dhe se heton të gjitha akuzat e besueshme për abuzim.

Në përgjigje të pyetjeve në lidhje me gjetjet e reja të Meksikës, një zëdhënës i NSO ka thënë se e vetmja mënyrë që të dhënat e reja mund të verifikoheshin është nëse ato do të rishikoheshin nga NSO.

Por që nuk i ishte dhënë akses në të dhënat nga Citizen Lab.

Po ashtu NSO-ja ka akuzuar Citizen Lab se nuk ishte në gjendje të bënte dallimin midis mjeteve të saj spyware dhe atyre të kompanive të tjera të inteligjencës kibernetike.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.