Kryeministri shqiptar Edi Rama mori pjesë të mërkurën në “Global Gateway Forum 2023”, i cili po zhvillohet në Bruksel, së bashku me liderë të tjerë nga e gjithë bota.
Ai përfshin një debat të zgjeruar mbi çështjet në lidhje me investimet globale në infrastrukturë, duke përfshirë sfidat me të cilat përballet sektori publik dhe privat, praktikat më të mira dhe mësimet e nxjerra.
“Jam tejet i nderuar që gjendem këtu sot dhe që kam privilegjin që të flas përpara kësaj salle dhe meqë ra fjala, nuk më kujtohet hera e fundit kur kam parë një sallë ku asnjë karrige nuk ishte bosh. Duket si mbledhja e Partisë Komuniste, por falë Zotit nuk është dhe jam i sigurt që gjithsecili prej jush ka ardhur këtu vetëm me vullnetin e tij ose të saj, askush nuk është detyruar edhe pse BE-ja i detyron njerëzit”, deklaroi kreu i Qeverisë.
Kujtojmë që, strategjia “Global Gateway” e BE-së lidh vendet dhe rajonet anembanë botës.
Kjo, duke inkurajuar investimet publike dhe private në një rrjet global të transportit dhe zinxhirëve të furnizimit, energjinë e gjelbër, telekomunikacionet moderne, arsimin dhe kërkimin, me theks në zhvillimin e qëndrueshëm dhe në vlerat evropiane, si qeverisja e mirë, transparenca dhe partneriteti i barabartë.
“Kur m’u tha që kisha vetëm pesë minuta, po mendoja që të punosh me BE-në duhet gjithmonë të mbash parasysh dy gjëra: të punosh fort dhe të flasësh shkurt”, shtoi kryeministri.
Vendet më të mëdha të BE-së nuk kanë dërguar drejtuesit e lartë në Bruksel për ngjarjen.
Gjermania përfaqësohet nga sekretarja e klimës Jennifer Morgan, ndërsa Franca dhe Danimarka kanë dërguar sekretarët e tyre të zhvillimit.
Italia nuk përfaqësohet fare – ndërsa ministri britanik i zhvillimit Andrew Mitchell është i pranishëm.
Brazili, India dhe Afrika e Jugut, vendet në grupin kinezo-rus të BRICS-it, nuk janë po ashtu të pranishëm.
Ngjarja po mbahet vetëm një javë pasi Pekin-i hapi tapetin e kuq për persona si presidenti rus Vladimir Putin, kryeministri hungarez Viktor Orbán dhe lideri indonezian Joko Widodo gjatë samitit “Brez dhe Rrugë”.
Mineralet kritike të papërpunuara, tranzicionet e gjelbra dhe dixhitale, si dhe korridoret e transportit do të shfaqen të gjitha në mënyrë të dukshme në forumin dyditor, me marrëveshjet që pritet të nënshkruhen midis Komisionit Evropian dhe krerëve vizitues të shteteve ose Qeverive, sipas zyrtarëve.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
