Rama tha se jemi në kushtet kur po shohim një rritje të numrave të infektimeve, kur kemi sinjale të arsyeshme mbi hyrjen në Shqipëri, të varianteve të reja të COVID-19. Kryeministri shtoi se po rritet infektimi i moshave më të reja dhe po ulet mesatarja e moshës së të shtruarve në spitalet COVID.
Kreu i qeverisë shtoi se nuk duhet të detyrohemi të kthehemi te masat e forta motivuese.
“Duhet motivim i gjithësecilit. Përgjegjësi maksimale qytetare. Ajo që po konsiderohet kudo si një tjetër valë infektimesh, po reflektohet edhe këtu. Masat që janë në fuqi janë masa të cilat në këndvështrimin e komitetit teknik funksionojnë, por që të funksionojnë si duhet duhen zbatuar”.
Qasja e autoriteteve të shëndetësisë dhe autoriteteve përgjegjëse për zbatimin e masave ka qenë më tepër sensibilizuese dhe mirëkuptuese se sa represive. Në javët e fundit konstatohet një rënie e angazhimit të qytetarëve në respektimin e masave. Nga mbajtja e maskës te zbatimi i rregullave të vendosura te njësitë tregtare.
Kryeministri pohoi se është e patolerueshme që politikanët të shkelin rregullat duke u mbledhur në salla dhe dhoma me më shumë persona numri i përcaktuar nga komiteti teknik. Ai e cilësoi të papërgjegjshme dhe të pajustifikueshme.
Rama bëri thirrje që të gjithë të zbatojnë masat, pasi numri i infektimeve rrezikon të rritet. Po ashtu barra e sistemit shëndetësor rrezikon të rëndohet. Ai tha se është ende larg që numri i të vaksinuarve të këpusë zinxhirin. Kjo vlen për vendet e tjera dhe për vendin tonë.
“Jemi në kushtet kur mund të shmangim këtë situatë. Zbatimi i masave duhet të jetë sa më korrekt”, tha kryeministri.
Pritet që Pfizer të fillojë lëvrimin e sasive të tjera hap pas hapi duke nisur nga mesi i shkurtit. Vaksinat do të shtohen dhe numri i vaksinave do të rritet sipas kalendarit.
U bë një thirrje për tregtarët. Ata nuk duhet të abuzojnë, pavarësisht rimëkëmbjes së vështirë.
“Tregtarët kanë një rëndësi të posaçme pasi dhe rreziku është më i madh, pasi ndërveprimi është më i madh”, shtoi Rama.
Kryeministri njoftoi se Policia e Shtetit dhe Inspektoriatet janë angazhuar maksimalisht. Nëse do të ketë një reagim të menjëhershëm nga ana e qytetarëve. Policia e Shtetit dhe Inspektoriatet do të veprojnë. U njoftua se në vitet në vijim do të rriten gjobat. Do të bëhet një përshkallëzim sipas hapësirave dhe kushteve për abuzim.
Rama e quajti të papranueshme që lokalet në Bllok dhe në zona të tjera të bëhen vatra të COVID-19. Kryeministri tha se kërkohet një mirëkuptim nga ana e qytetarëve.
Kryeministri kërkoi një angazhim më të madh të qytetarëve në respektimin e masave. Duhet të ketë një zbatim rigoroz të masave. Në të kundërt qeveria do të reagojë me forcë. Ai e cilësoi një thirrje për solidaritet, unitet, për të mos hapur të çara në një front të bashkuar.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
