Qeveria spanjolle do të zgjidhë situatën e ‘papranueshme’ në federatën e futbollit

Qeveria spanjolle premtoi të martën se do të marrë masa kundër Federatës Spanjolle të Futbollit. Organizata është goditur nga skandal pas skandali. Ish-presidenti i saj, Luis Rubiales, është nën hetim për korrupsion dhe tani pasardhësi i tij, Pedro Rocha, po hetohet nga Gjykata e Lartë e Sporteve.

“Qeveria spanjolle është e përkushtuar për zgjidhjen e gjendjes ‘të papranueshme’ të federatës”, tha ekzekutivi spanjoll, duke premtuar se do të trajtojë situatën skandaloze në të cilën ndodhet federata e futbollit të vendit (RFEF).

Skandal pas skandali, zyrtarët spanjollë kanë frikë se FIFA mund të dyshojë në aftësinë e vendit për të pritur Kupën e Botës 2030.

Spanjë, tani rrezikohet Kupa e Botës 2030

Jose Manuel Uribes, president i Këshillit Suprem të Sportit (CSD) dhe sekretar i shtetit për sportin, këmbënguli se skandalet nuk do të kishin “absolutisht asnjë ndikim” në ofertën e Spanjës për të pritur Kupën e Botës 2030.

“Unë flas me FIFA-n pothuajse çdo ditë, mendoj se nuk ka pasur kurrë një komunikim kaq të rrjedhshëm”, shtoi ai.

“Ata janë të sigurt se Spanja është një vend që di të organizojë gjërat… Botërori nuk është në rrezik”, deklaroi ai.

Por besueshmëria mund të jetë në rrezik. Çdo javë sjell një kapitull të ri në skandalin e korrupsionit që ka përfshirë drejtuesit e lartë të RFEF-së.

Fillimisht ishte ish-presidenti Rubiales, i cili dha dorëheqjen shtatorin e kaluar pasi puthi me forcë fituesen e Kupës së Botës për femra, Jenni Hermoso, dhe aktualisht është nën hetim për një çështje korrupsioni.

Situata e tij është kritike pasi u arrestua në kthimin e tij në Spanjë nga Republika Domenikane, ku ndodhej në fillim të hetimeve dhe u kontrollua shtëpia e tij dhe selia e federatës spanjolle.

Arrestohet Luis Rubiales, ish-kreu i Federatës Spanjolle të Futbollit

Rubiales ka këmbëngulur gjithmonë për pafajësinë e tij, por çdo ditë dalin më shumë prova, duke e vënë atë në një pozitë të vështirë.

Tani i vetmi kandidat për të zëvendësuar Rubiales, Pedro Rocha, është gjithashtu nën hetim. Një raport nga Gjykata Supreme e Sporteve të vendit (TAD) sugjeron se RFEF ka marrë vendime “përtej kompetencës së saj”.

“Këshilli Superior i Sportit (CSD) dhe qeveria do të bëjnë gjithçka që është e mundur për të korrigjuar këtë situatë të papranueshme”, tha Jose Manuel Uribes, president i CSD dhe Sekretar i Shtetit për Sportin.

Sipas mediave spanjolle, gjykata sportive zbuloi se komiteti drejtues i RFEF, i cili mori frenat pas dorëheqjes së Rubiales, kishte ndërmarrë veprime që nuk kishte autoritetin për të ndërmarrë, duke përfshirë zgjatjen e kontratës së trajnerit të ekipit të meshkujve, Luis de la Fuente.

“Unë do të thërras një mbledhje të bordit në ditët e ardhshme për të marrë një vendim pas rezolutës (të TAD), e cila përshkruan veprimet e presidentit të RFEF dhe bordit në muajt e fundit si shumë serioze”, tha Uribes.

Hetimet për Superkupën: Pas Rubiales e pëson edhe pasardhësi i tij Pedro Rocha

Me gjithë këtë informacion, CSD mund të shpallë Rocha, nënkryetar në kohën e Rubiales dhe më pas kreun e përkohshëm të RFEF, të papërshtatshëm për presidencën. Ai është kandidati i vetëm për zgjedhjet e 6 majit.

Deri më sot, nuk ka kandidatë të tjerë dhe besueshmëria e Rocha është në nivelin më të ulët historik.

Sipas mediave spanjolle, kandidati i vetëm për kryetar të RFEF nuk është i përgatitur të japë dorëheqjen. Ai do të mbrohet në gjykatë. Që kur mësoi se ishte nën hetim, ai ka udhëzuar avokatët e tij që të studiojnë veprimet e CSD-së dhe Tribunalit të Sporteve.

Hetimi i korrupsionit përqendrohet në kontratën fitimprurëse të nënshkruar nga Rubiales për të transferuar Superkupën e Spanjës në Arabinë Saudite. Ish-lojtari i Barcelona-s dhe Spanjës, Gerard Pique është gjithashtu i përfshirë në këtë rast.

Parregullsitë me kontratat e Superkupës në Arabi, shtatë arrestime në Spanjë

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.