Kryeministri hungarez Viktor Orbán dhe ish-kryetarët e qeverisë Silvio Berlusconi dhe Gerhard Schröder janë të vetmit politikanë të BE-së që morën urimet e presidentit rus Vladimir Putin për Krishtlindjet dhe Vitin e Ri këtë vit.
Kjo, sipas një deklarate të publikuar nga Kremlini të premten, shkruan “Politico”.
Krahas Orban-it, Putin u dërgoi mesazhe më të ngrohta Aleksandër Lukashenkos dhe Aleksandar Vuçiçit, homologëve të tij bjellorus dhe serb, si dhe dy miqtë më të ngushtë të Moskës në kontinentin evropian.
Mesazhi i Putin-it drejtuar Orbanit, i vetmi lider i BE-së që mori urime, mbeti qëllimisht i paqartë, vëren “Politico”.
“Pavarësisht situatës së vështirë ndërkombëtare, marrëdhëniet mes vendeve kanë ruajtur një trend pozitiv”, thuhet në deklaratë për Hungarinë. “Presidenti i Rusisë konfirmoi gjithashtu synimin e tij për të vazhduar punën e përbashkët për çështjet aktuale në agjendën dypalëshe”.
Për Lukashenkon, në deklaratë shkruhet se falë bashkëpunimit të ngushtë aleat, “Rusia dhe Bjellorusia i përballuan me nder vështirësitë dhe sprovat e vitit që po largohet” dhe arritën “t’i rezistojnë efektivisht presionit të paprecedentë politik dhe sanksioneve”.
Kujtojmë që Bjellorusia u përdor nga Rusia si bazë për të nisur pushtimin e saj në shkallë të plotë të Ukrainës shkurtin e kaluar dhe të dy vendet janë nën sanksione ndërkombëtare, duke dëmtuar ekonomitë e tyre.
Edicioni i këtij viti i listës tradicionale të Kremlinit të “urimeve” për krerët e shteteve dhe qeverive është dukshëm më i shkurtër se ai i vitit të kaluar, duke reflektuar pozicionin e izoluar të Rusisë në skenën ndërkombëtare.
Megjithatë, disa ish-krerë shtetesh janë ende në anën e mirë të listës.
Ish-kryeministri italian Silvio Berlusconi, tashmë senator dhe pjesë e koalicionit të drejtuar nga Giorgia Meloni, është përgëzuar.
Ai zuri ballinat në muajin tetor për shkak të regjistrimeve të zbuluara në të cilat ai mburrej për miqësinë e tij me Putin-in.
Ish-kancelari gjerman Gerhard Schröder, i cili këtë verë u zhvendos nga zyra e tij parlamentare për shkak të lidhjeve të tij me shefin e Kremlin-it, mund të gjejë ngushëllim duke e gjetur veten në listën e Putin-it këtë vit.
Në vitin 2021, Putin u drejtoi përshëndetjet e tij më shumë se një duzinë krerëve të shteteve dhe qeverive evropiane, duke përfshirë ata të Italisë, Gjermanisë dhe Francës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
