Pse Papa Francesco po viziton DRC dhe Sudanin e Jugut?

Papa Francesco po viziton Republikën Demokratike të Kongos dhe Sudanin e Jugut këtë javë për të dhënë një mesazh paqeje dhe pajtimi për dy vendet e goditura nga konflikti.

Papa do të nisë udhëtimin e tij të martën në kryeqytetin kongolez Kinshasa, ku do të qëndrojë deri të premten përpara se të shkojë në Juba, kryeqyteti i Sudanit të Jugut.

Drejtuesit e Kishës Anglikane dhe Kishës së Skocisë do t’i bashkohen Papës në pjesën e dytë të udhëtimit.

Udhëtimi gjashtë-ditor fillimisht ishte planifikuar për në korrik 2022, por u shty pasi Francesco pësoi probleme me gjurin e tij, të cilat së fundmi e kanë detyruar të përdorë një karrige me rrota.

Udhëtimi do të jetë i 40-ti jashtë vendit që kur ai u zgjodh kreu i Kishës Katolike në 2013. Kjo do të jetë vizita e tij e pestë në Afrikë.

Pse Papa po viziton DRC?

I dërguari i Vatikanit në Republikën Demokratike të Kongos ka thënë se udhëtimi do t’i kujtojë botës që të mos injorojë konfliktet dhjetëravjeçare.

Për vite me radhë, vendi i Afrikës Qendrore ka luftuar me paqëndrueshmërinë dhe varfërinë, pavarësisht nga pasuria e tij e madhe minerale.

“Kongoja mishëron gjithashtu padrejtësinë sociale, skandalin e moszhvillimit dhe varfërisë”, tha Samuel Pommeret nga organizata joqeveritare CCFD-Terre Solidaire.

Ka qenë një fushë beteje për më shumë se 100 grupe të armatosura që luftojnë për kontrollin e territorit atje ose duke e përdorur atë si bazë për të nisur sulmet në disa nga fqinjët e DRC-së, si Angola, Burundi, Republika e Afrikës Qendrore, Ruanda dhe Uganda.

Më i njohuri është M23, i cili është ndër më vdekjeprurësit në Kivu-në e Veriut dhe Ituri, dy provinca lindore të minierave në kufi me Ruandën dhe Ugandën. Qeveria kongoleze, ekspertët e Kombeve të Bashkuara dhe Bashkimi Evropian kanë akuzuar Ruandën për mbështetjen e rebelëve, një akuzë që Kigali e mohon.

Konflikti ka zhvendosur gjysmë milionë njerëz dhe ka vrarë qindra.

“Zëri i Papës do të jetë jashtëzakonisht inkurajues për vendin, por gjithashtu do të jetë një nxitje e fortë për klasat politike për të zgjidhur problemet e vendit”, tha Mauro Garofalo, kreu i marrëdhënieve ndërkombëtare në Komunitetin e Sant’Egidio me qendër në Romë.

Francescu do të jetë Papa i parë që viziton vendin që nga viti 1985, i cili “mund të japë gjithashtu një mesazh për aktorët ekonomikë që përfitojnë nga këto pasuri”, tha Pommeret.

Rreth 45 milionë njerëz nga popullsia e vlerësuar prej 100 milionë e DRC janë katolikë. Më shumë se një milion njerëz pritet të marrin pjesë në një meshë në ajër të hapur që Françesku do të kremtojë të mërkurën në aeroportin e Kinshasës.

Pse Papa po viziton Sudanin e Jugut?

Papa ka shprehur interes për të vizituar Sudanin e Jugut kryesisht të krishterë, por planet u shtynë për shkak të shëndetit të tij dhe paqëndrueshmërisë në vend.

Papa pritet të dërgojë një apel për paqe me kryepeshkopin e Canterbury, Justin Welby dhe moderatorin e Kishës së Skocisë, Iain Greenshields.

Në vitin 2019, krerët e kishave katolike, anglikane dhe skoceze u takuan në Vatikan me rivalët e Sudanit të Jugut, Riek Machar dhe Salva Kiir për t’i inkurajuar ata të shpëtonin një marrëveshje paqeje të ngecur të nënshkruar një vit më parë.

Në një akt që mahniti botën, Francesco u gjunjëzua dhe puthi këmbët e dyshes, duke i kërkuar që të mos ktheheshin në konflikt pasi të dy burrat ishin akuzuar për përgjegjësi për krime lufte.

Sudani i Jugut, kombi më i ri në botë, u nda zyrtarisht nga Sudani në vitin 2011, por lufta civile shpërtheu dy vjet më vonë, duke shkaktuar 400 mijë vdekje. Dy palët kryesore në konflikt nënshkruan një marrëveshje paqeje në vitin 2018, por ka çështje të vazhdueshme.

Ka 2.2 milionë njerëz të zhvendosur brenda në Sudanin e Jugut dhe 2.3 milionë të tjerë janë larguar nga vendi, sipas OKB-së.

Në qershor, OKB-ja ndërpreu ndihmën ushqimore për Sudanin e Jugut për shkak të financimit të pamjaftueshëm. Organizatat e ndihmës thanë se donatorët kishin devijuar vëmendjen te lufta në Ukrainë. OKB tha se 7.76 milionë njerëz, rreth dy të tretat e popullsisë së Sudanit të Jugut, ka të ngjarë të përballen me mungesa akute ushqimore këtë vit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.