Partia Socialdemokrate përmes një aksioni të mbajtur para Agjencionit për Informim dhe Privatësi të mërkurën e 12 prillit ka kundërshtuar gjobën nga ky institucion që është shqiptuar ndaj kësaj partie.
Kryetari i PSD-së, Dardan Molliqaj deklaroi para gazetarëve se gjobë kanë pranuar edhe nga Policia e Kosovës.
Sipas tij, komisionerja Krenare Sogojeva-Dermaku “është militante e VV-së”.
“Arsyeja e këtij aktiviteti është një gjobë prej 20 mijë eurove që Agjensioni për Privatësi ka shqiptuar ndaj Partisë Socialdemokrate. Më lejoni t’i them disa gjëra; kapja e institucioneve të pavarura tashmë është shndërruar në instrumente vepruese”.
“Ky institucion siç mund ta dini drejtoresha e këtij institucioni është një militante politike e Vetëvendosjes, e cila është emëruar nga kjo Qeveri”, u shpreh Molliqaj.
Më 25 mars, aktivistë të Partisë Socialdemokrate kanë hedhur tym të zi para ndërtesës së Qeverisë së Kosovës për të shprehur indinjatën e tyre me ekzekutivin aktual.
Të njëjtit paraprakisht, kanë hequr flamujt e Kosovës para ndërtesës së Qeverisë dhe kanë vendosur flamuj të bardhë si simbol dorëzimi.
Ndërsa tymi i zi po mbulonte ndërtesën e Qeverisë së Kosovës, kryetari i PSD-së, Dardan Molliqaj, gjatë fjalimit të tij para protestuesve kishte thënë se duhet të vazhdohen përpjekjet për të ndaluar qeverinë e cila u dorëzua para nevojës për të mbajtur pushtetin.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
