Përse Qeveria e Kosovës nuk reagon asnjëherë kur sulmohen gazetarët në Veri?

Situata e tensionuar në Veri ka krijuar ambient të pasigurt për raportimin e gazetarëve nga vendi i ngjarjes.

Sulmet ndaj gazetarëve në Kosovë nga persona të maskuar, prejse ka filluar tensionimi i situatës në Veri kanë qenë të shpeshta.

Brenda 17 ditëve, 13 punëtorë të medias janë sulmuar në Veri, në mesin e tyre kanë qenë gazetarë/e, fotoreporterë, kameramanë, shoferë.

Këtë të hënë një ekip gazetarësh nga TV Klan Kosova janë sulmuar me gurë nga persona me maska.

Dy veta nga ekipi i gazetarëve u desh të dërgoheshin në spital për trajtim.

Për rastin kanë reaguar edhe nga Bashkimi Evropian, por as për këtë rast, si për asnjë rast tjetër të sulmeve ndaj gazetarëve në Veri, nuk ka reaguar Qeveria e Kosovës.

Kryetari i Asociacionit të Gazetarëve të Kosovës (AGK), Xhemajl Rexha, në një bisedë për Albanian Post thotë se “nuk kemi pranuar ndonjë reagim nga Qeveria”, edhe pse do të duhej.

“Pra, personat e Qeverisë duhet të bashkëpunojnë me organet e sigurisë me Policinë e Kosovës dhe të jenë në kontakt të vazhdueshëm. Ne si AGK kërkojmë një ambient të sigurt për gazetarët e Kosovës”, tha Rexha për AP.

Sulmi i fundit ndaj gazetarëve të Klan Kosovës në Veri i bëri ata që të hospitalizohen në spital për shkak të lëndimeve.

Pas këtij sulmi, Albanian Post, ka kontaktuar me zëdhënësin e Policisë së Kosovës për rajonin e Mitrovicës së veriut, Besim Hoti i cili tha për Albanian Post se rasti është duke u trajtuar në statcionin jug Mitrovicë.

“Rasti ka ndodhur në Zupq të Zubin Potokut, rasti është duke u trajtuar në stacionin jug Mitrovicë, kurse deklaratat duhet siguruar nga të dëmtuarit”, tha Hoti për AP.

Policia e Kosovës më vonë publikoi një komunikatë për media për të cilën tha se ka nisur hetimet.

“Lidhur me rastin Policia e Kosovës, po kryen hetime me qëllim të zbardhjes së rastit dhe sjelljes para organeve të drejtësisë së personave të dyshuar”.

Sulmin e së hënës e ka dënuar edhe Federata Evropiane e Gazetarëve, përmes një cicërime në rrjetin social ‘Twitter’.

“Ekipi i televizionit Klan Kosova është sulmuar sot nga banorë të maskuar në veri të Kosovës. Gazetari dhe shoferi janë plagosur. Ne bëjmë thirrje NATO_KFOR dhe EULEX Kosova për të mbrojtur gazetarët gjatë raportimit në rajon!”, thuhet në reagimin e kësaj Federate.

Klan Kosova TV crew attacked today by masked locals in Northern #Kosovo. Journalist and driver are injured. We call on @NATO_KFOR and @EULEXKosovo to protect journalists while reporting in the region!@AGK_AJKhttps://t.co/PPGXLQ17J7

— EFJ (@EFJEUROPE) December 26, 2022

Edhe, Bashkimi Evropian e ka dënuar sulmin ndaj gazetarëve.

“Ne e dënojmë fuqishëm sulmin e sotëm ndaj ekipit të Klan Kosovës në Zubin Potok dhe u urojmë atyre shërim të shpejtë”, thuhet në reagim.

“Ky dhe incidentet e mëhershme që e prekin punën e mediave janë të papranueshme. Mediat kanë çdo të drejtë që të raportojnë. Siguria e tyre nuk duhet të rrezikohet”.

Mirëpo, ekipi i gazetarëve të këtij mediumi nuk është sulmuar për herë të parë.

Një sulm i ngjashëm kishte ndodhur edhe më 19 dhjetor.

Edhe, më 9 dhjetor, kishte ndodhur sulm ndaj gazetarëve të mediumit Kallxo.com në Veri.

Ekipi i këtij mediumi ishte sulmuar nga një grup i maskuar i serbëve, “në afërsi të Shkollës Teknike”.

Pse po ndodhin sulmet ndaj gazetarëve në Veri?

Tash e 17 ditë barrikadat vazhdojnë të bllokojnë rrugët në Veri, në zonat ku gjenden barrikadat shpesh shihen vetura të misionit paqeruajtës të NATO-s në Kosovë, KFOR.

Ato fillimisht u vunë si shenjë proteste ndaj arrestimit të Dejan Pantiç nga policia, një ish polic serb i Kosovës që tashmë akuzohet për sulm ndaj policisë.

Ai ishte larguar nga radhët e policisë bashkë me afër 600 të tjerë meqë kolektivisht vendosën ta braktisin forcën policore me urdhër politik të Listës Serbe për të lëshuar institucionet në të gjitha nivelet.

Kjo, pasi qeveria e Kosovës mori vendim të zbatojë masa për vozitësit e makinave me targa ilegale.

Pas sugjerimeve të ndërkombëtarëve Kosova hoqi dorë nga implementimi i masave, por serbët nuk u kthyen në institucione.

Si përshkallëzim vendosën edhe barrikada në 11 vende. Meqë gjithçka u bllokua, Kosova vendosi të mbyllë dy pika kufitare në Jarinjë dhe Bërnjak.

Kosova vetë nuk po i largon barrikadat dhe këtë ia ka kërkuar KFOR-it. Deri më tani nuk ka ndërmarrë ndonjë hap as KFOR-i, duke lënë të ngrirë situatën në Veri.

Kjo krizë ka bllokuar edhe dialogun në Bruksel, i cili u duk se po futej në një fazë përfundimtare me propozimin franko-gjerman.

Aktualisht në Veri forca patrulluese është KFOR-i, derisa policia e Kosovës nuk mund të lëvizë vetë në vende të ndryshme pa asistencën e KFOR-it.

Për pasojë edhe një grup policësh mbetën të bllokuar në pikat kufitare në Veri për14 ditë, derisa KFOR dhe EULEX ndihmuan zëvendësimin e tyre.

Kurse, më 26 dhjetor, rreth orës 20:00 të së dielës u dëgjuan breshëri armësh në rrethinë të Zubin Potokut në Veri të Kosovës, afër njërës nga barrikadat e vendosura nga serbët atje.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.