Presidentja e Kosovës, Vjosa Osmani, përmes një cicërime në Twitter, ka thënë se është shumë e pikëlluar për vdekjen e Presidentit të Parlamentit Evropian, David Sassoli.
“Një person me vlera të mëdha, të cilin pata privilegjin ta takoj personalisht vetëm një vit më parë”, shkroi Osmani në Tëitter.
“Një mik i vërtetë i kombit dhe popullit tonë. Kjo është një humbje shkatërruese për familjen e tij, por edhe për BE-në dhe botën”, shtoi ajo.
Edhe kryeministri e Kosovës, Albin Kurtin, e ka cilësuar si mik të Kosovës Sassolin.
“Jemi të trishtuar të mësojmë se ka ndërruar jetë David Sassoli, presidenti i Parlamentit Evropian dhe miku i Kosovës”.
Për kryeministrin kosovar, Sassoli ishte “një njeri që më të vërtetë solli vlera evropiane brenda institucioneve të Bashkimit Evropian”.
Duke përfunduar, Kurti shkruan se “do na mungojë tmerrësisht shumë”.
Presidenti i Parlamentit Evropian, David Sassoli, në moshën 65-vjeçare, është ndarë nga jeta në orët e para të mëngjesit të 11 janarit.
Lajmin e ka bërë të ditur zëdhënësi i tij për shtyp, teksa ka shpjeguar se ish-gazetari i qendrës së majtë në Itali, kishte qenë në gjendje të rënduar shëndetësore për më shumë se dy javë dhe kishte anuluar të gjitha angazhimet e tij politike.
Për shkak të komplikimeve me sistemin e tij imunitar, Sassoli ishte pranuar në një spital italian muajin e shkuar.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com