Osmani në Kanada, takohet me kryeministrin Trudeau

Presidentja e Kosovës, Vjosa Osmani, të martën e 23 nëntorit do të takohet me Kryeministrin e Kanadasë, Justin Trudeau dhe me Guvernatoren e Përgjithshme të Kanadasë, Mary Simon.

Kështu është bërë e ditur në faqen zyrtare të presidencës, ku thuhet se ky takim është një ri-konfirmim i marrëdhënieve të mira midis Kosovës dhe Kanadasë.

“Sipas Presidentes Osmani takimet me lidershipin e Kanadasë janë mundësi e mirë për ri-konfirmim të marrëdhënieve të shkëlqyeshme me shtetin kanadez, sikurse edhe për të hapur shtigje të reja bashkëpunimi”, thuhet në njoftim.

Sipas njoftimit, thuhet se në të dy takimet, Osmani do t`i njoftojë bashkëbiseduesit për të arriturat e Kosovës.

“Në të njëjtën kohë do t`i shqyrtojë mundësitë për rritje të bashkëpunimit në fusha të interesit të dyanshëm”, vijon njoftimi.

Ndërkaq, më 19 shtator, Osmani pati udhëtuar zyrtarisht në Shtetet e Bashkuara të Amerikës e shoqëruar nga Ministrja e Jashtme, Donika Gërvalla.

Po ashtu, ajo ishte për vizitë edhe në Gjermani, ku ka kërkuar nga homologu i saj gjerman Frank Walter Steinmeier, ta ndihmojë Kosovën për të marrë njohje të reja dhe po ashtu për t’u anëtarësuar në organizata ndërkombëtare.

“Gjermania ka mbështetur Kosovën në të gjitha aspiratat e saj integruese ndërkombëtare dhe evropiane: procesin e integrimit në BE, anëtarësimin në organizatat ndërkombëtare dhe veçanërisht lobimin dhe mbështetjen për liberalizimin e vizave”.

“Ne kemi nevojë për një zë të fortë mbi kërkesën tonë për liberalizimin e vizave, dhe nuk ka asnjë zë më të mirë se Gjermania”, pati deklaruar Osmani.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.