Ministria e Drejtësisë demanton lajmin për pezullimin e marrëveshjes për burgje me Danimarkën

Zëvendësministri i Drejtësisë, Blerim Sallahu, ka demantuar raportimet se marrëveshja për burgjet mes Kosovës dhe Danimarkës është pezulluar.

Sallahu këtë e ka bërë të ditur përmes një shkrimi në rrjetin social ‘Facebook’.

“Duam të njoftojmë opinionin dhe publikun e gjerë se lajmet e shpërndara se gjoja Mbretëria e Danimarkës është tërhequr nga Traktati ndërmjet Republikës se Kosovës dhe Mbretërisë së Danimarkës për shfrytëzimin e institucionit korrektues në Gjilan me qëllim të ekzekutimit të dënimeve daneze nuk qëndron dhe nuk është i vërtetë”, ka shkruar ai.

Teksa ka thënë se konfirmimin e kanë marrë edhe nga Danimarka të hënën.

“Gjatë ditës së sotme, kemi komunikuar drejtpërdrejt me zyrtarët nga Ministria e Drejtësisë së Mbretërisë së Danimarkës dhe ata na kanë konfirmuar se qëndrojnë tërësisht pranë zotimeve të dakorduara në Traktat dhe asgjë nuk ka ndryshuar në raport me marrëveshjen e përbashkët”.

“Është e rëndësishme të theksohet se tashmë shteti danez e ka ratifikuar Traktatin edhe në Parlamentin e tyre dhe gjithçka po vazhdon sipas planit të paracaktuar drejt përmbushjes së obligimeve të dyanshme mes nesh”.

Sallahu, ka theksuar se shumë shpejt do të procedohet për shfrytëzimin e institucionit korrektues në Gjilan.

“Në këtë drejtim, edhe ne së shpejti do të procedojmë Traktatin ndërmjet Republikës së Kosovës dhe Mbretërisë së Danimarkës për shfrytëzimin e institucionit korrektues në Gjilan me qëllim të ekzekutimit të dënimeve daneze për në Qeverinë e Republikës së Kosovës për miratim, prej ku do të përcillet për në Kuvend për ratifikim”.

Marrëveshja e Danimarkës me institucionet korrektuese që të dërgohen disa të burgosur është pezulluar.

Kështu kishte bërë të ditur mediumi “Ekstrabladet” gjatë ditës së hënë.

Kjo marrëveshje ishte përcjellë me kritika nga shoqatat e të drejtave të njeriut në Danimarkë.

Në tetor të vitit 2020, institucionet Korrektuese të Kosovës filluan një bashkëpunim me institucionet korrektuese të Danimarkës.

Ministri i Drejtësisë së Danimarkës, Nick Hakkerup, kishte deklaruar se kjo marrëveshje me Kosovën është diskutuar që një vit.

“Nënshkruam një letër qëllimi. Është një gur themel për bashkëpunimet e tjera mes Kosovës. Shërbimi Korrektues i Danimarkës ka qenë i mbingarkuar dhe Kosova është kontaktuar para një viti”, kishte potencuar Hakkerup.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.