Norbert Haug, një ish-bos i Mercedes në Formula 1, thotë se është një “mister” pse Lewis Hamilton vendosi të bashkohej me Ferrarin për vitin 2025.
Të hënën në prezantimin e Aston Martin, ish-piloti i Ferrarit, Fernando Alonso, u tall me arsyetimin e Hamilton-it, se ka qenë gjithmonë “ëndrra e fëmijërisë” e 39-vjeçarit që të garonte me makinën e kuqe.
“Nuk ishte ëndrra e tij e fëmijërisë 12 muaj më parë, apo jo?”, tha spanjolli me buzëqeshje. “Ose dy muaj më parë, mendoj ishte një ëndërr ndryshe”.
Në të vërtetë, Haug pranoi se asnjë anëtar i F1 nuk u befasua më shumë se ai kur dëgjoi lajmin se Hamilton do të largohej nga Mercedes në fund të këtij viti.
“Nëse do të kisha vënë bast për një gjë, për një partneritet në Formula 1 që do të zgjaste përgjithmonë, do të ishin Lewis Hamilton dhe Mercedes”, tha për “motorsport-magazin.com” Haug.
“Unë u mahnita plotësisht nga kjo”, shtoi 71-vjeçari. “Unë do të isha betuar se do të qëndronte kështu përgjithmonë. Dhe se ai do të qëndronte pasi të mbaronte si ambasador i markës apo çfarëdo tjetër”.
Toto Wolff, shefi i ekipit dhe bashkëpronar i Mercedesit, nuk ka folur për atë që shkoi keq mes tij dhe shtatë herë kampionit të botës.
Haug mendon se arsyet e vërteta janë ende të fshehura.
“Është mister”, tha gjermani. “Shumë pak njerëz ndoshta e dinë këtë. Toto Wolff do ta dijë”.
Ajo që është e qartë për Haug është se Wolff po i thotë lamtumirë më shumë sesa thjesht një shoferi të klasit botëror, por edhe një superylli global.
Vetë Wolff e pranon hapur se e kupton që largimi i Hamilton mund të ketë edhe pasoja financiare për Mercedesin.
“A ka ndonjë rrezik?”, tha Wolff për “CNBC”. “Sigurisht, sepse Lewis është shumë më tepër se thjesht një shofer. Është e qartë se pas vitit 2024 do të na mungojë diçka”.
“Por një ekip si Mercedes duhet të ketë identitetin e vet dhe ne do ta kemi gjithmonë atë në të ardhmen”, theksoi ai.
Megjithatë, mund të argumentohet se Ferrari po rrezikon gjithashtu duke mirëpritur atë që do të jetë një pilot 40-vjeçar në Maranello për vitin 2025 dhe më tej.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
