Kurti: Punësimi është më i lartë se çka qenë ndonjëherë, eksportet dhe investimet e huaja janë dyfishuar

Kryeministri i Kosovës, Albin Kurti, ka thënë të shtunën se punësimi është më i lartë se cka qenë ndonjëherë në Kosovë.

Këto komente, Kurti i ka bërë përmes një postimi në Facebook, ku ka thënë se ka dyfish më shumë të rinj të punësuar në treg të punës se kur e ka marrë në dorë udhëheqjen e ekzekutivit.

“Afër 10 mijë të rinj mes moshës 18-29 vjeç janë punësuar përmes platformës qeveritare Superpuna. Mbi 12 mijë gra janë punësuar përmes masave dhe mbështetjes sonë direkte. Eksportet dhe Investimet e Huaja Direkte janë dyfishuar”, ka shkruar Kurti.

Kryeministri ka theksuar se në tri vjet qeverisje “rishpërndamë rreth 1.2 miliard euro te qytetarët dhe bizneset përmes masave të shumta, pa krijuar borxhe të reja”.

“Kemi pasur pakon më të madhe mbështetëse në rajonin e Ballkanit për qytetarë në ballafaqim me inflacionin dhe krizën energjetike, si përqindje e Bruto Produktit Vendor sipas Raportit të Bankës Botërore. Shpenzimet kapitale në vitin e kaluar shënuan vlerë rekord prej 555 milionë euro të ekzekutuara. Ndërkohë që borxhin publik e kemi në nivelin më të ulët në Evropë”, shtoi.

“Në vitin 2020 faturat e papaguara nga qeveritë e kaluara për mallra dhe shërbime që kanë marrë nga bizneset kanë qenë në vlerë prej 140 milionë euro. Në fund të vitit të kaluar ky borxh është ulur në vetëm 33 milionë”.

Sipas Kurtit, qarkullimi i bizneseve në vitin 2023 ishte “për 58 për qind më i lartë se ai në vitin 2019, vit parapandemik”.

“Bruto Produkti Vendor ka arritur vlerën 9.6 miliardë euro, nga 6.7 miliardë euro sa ishte kur morëm qeverisjen nën drejtim – pra 3 miliardë euro më shumë për tri vjet qeverisje, me deficit minimal. Qeverive në të kaluarën u duhej tri vjet kohë për t’ia shtuar 1 miliard euro ekonomisë, dhe atë përmes borxheve dhe shfrytëzimit të fondeve të mbledhura nga privatizimi”.

Për të gjitha këto “të arritura”, Kurti potencoi se “jemi krenar dhe ballëhapur”, derisa pretendoi se tre vjet pasi që ka marrë drejtimin e vendit “entuziazmi i qytetarëve për qeverinë tonë është vullneti ynë për të shërbyer”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.