Kryevepra e Kandinsky-t shitet për 37.2 milionë paund në ankand në Londër

Një kryevepër e Wassily Kandinsky që ishte vjedhur nga nazistët, të cilët vranë pronarin e saj në kampin e përqendrimit të Aushvicit në vitin 1944, është shitur për një rekord prej 37.2 milionë paund në ankand në Londër.

Piktura u shit në Sotheby’s në emër të stërnipërve të pronarit.

Ata u ribashkuan së fundmi me veprën e vitit 1910, të titulluar Murnau mit Kirche II, e cila ishte zbuluar në një muze në Eindhoven në Holandë.

Pasardhësit e Johanna Margarethe Stern-Lippmann dhe Siegbert Stern, themeluesit e një kompanie tekstile dhe koleksionistësh të etur arti, thanë se do të përdornin disa nga të ardhurat e shitjes për të gjetur më shumë nga koleksioni i madh i artit të familjes që u sekuestrua nga nazistët në vitet 1930.

Piktura, e cila përshkruan fshatin bavarez të Murnau me një shpërthim ngjyrash, ishte varur në dhomën e ngrënies së çiftit në vilën e tyre në Potsdam, Berlin.

Dhe thuhet se ka paralajmëruar lëvizjen e mjeshtrit rus drejt artit abstrakt.

Shitja prej 37.2 milionë paund ka vendosur një çmim të ri rekord për një vepër të Kandinsky. Shuma e mëparshme më e lartë e paguar në ankand ishte 33 milionë paund.

Pronarët e saj origjinal ishin miq me disa nga shkrimtarët dhe mendimtarët më me ndikim të kohës së tyre, duke përfshirë Thomas Mann, Franz Kafka dhe Albert Einstein.

Koleksioni i çiftit me më shumë se 100 vepra arti varionte nga pikturat e vjetra mjeshtërore holandeze te Renoir dhe artistët modernë duke përfshirë Munch dhe Kandinsky.

Pas ardhjes në pushtet të nazistëve gjithçka ndryshoi.

Edhe pse Stern vdiq për shkaqe natyrale në vitin 1935, Stern-Lippmann u detyrua të largohej nga Gjermania dhe më vonë u vra në Aushvic.

Koleksioni i tyre spektakolar i artit u grabit dhe u shpërnda në të gjithë rajonin. Vendndodhja e shumë prej pikturave është ende e panjohur.

Murnau mit Kirche II u zbulua thuajse 10 vjet më parë në muret e Van Abbemuseum në Eindhoven, ku ishte varur që nga viti 1951. Pas një beteje të gjatë ligjore, iu kthye 13 pasardhësve të familjes Stern vitin e kaluar.

Ata kanë thënë se një pjesë e të ardhurave nga shitja do të “financonte kërkime të mëtejshme për fatin e koleksionit të familjes”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.