Kontrabandë armësh dhe ari të dyshuar, arrestohet deputeti jordanez

Izraeli ka arrestuar një anëtar të parlamentit jordanez në një rast lidhur me kontrabandën e supozuar të armëve dhe arit në Bregun Perëndimor të pushtuar, tha Ministria e Jashtme e Jordanisë.

Imad al-Adwan, një anëtar i parlamentit të Jordanisë, i cili kishte kaluar një pikë kufitare kryesore përgjatë lumit Jordan më herët të dielën me makinë, po mbahej dhe po merrej në pyetje nga autoritetet izraelite, tha në një deklaratë Sinan Majali, një zëdhënës i ministrisë së Jashtme jordaneze.

“Ministria dhe të gjitha agjencitë përkatëse në mbretëri po punojnë për të konstatuar detajet e kësaj çështjeje dhe për ta trajtuar atë sa më shpejt të jetë e mundur”, tha Majali.

Al-Adwan ishte arrestuar “për marrjen në pyetje në një rast në lidhje me kontrabandën e supozuar të sasive të armëve dhe ari”, tha ai.

Një zëdhënës i ministrisë së Jashtme të Izraelit nuk pranoi të komentonte mbi raportet për arrestimin.

Al-Adwan, 35 vjeç, është anëtar i Komitetit Palestinez të parlamentit jordanez.

Mediat izraelite raportuan se ai u arrestua në pikën kufitare të urës së mbretit Husein (Allenby) në Bregun Perëndimor të pushtuar.

Nuk ka pasur asnjë koment zyrtar nga autoritetet izraelite për arrestimin e al-Adwan. Ligjvënësi i shquar jordanez Khalil Atiya, i cili njihet për kundërshtimin e tij të zëshëm ndaj Izraelit dhe ka udhëhequr fushatat për të shfuqizuar traktatin e paqes të vendit me Izraelin, tha se qeveria do të mbante përgjegjësi nëse nuk vepronte shpejt.

“Nuk duhet t’i lihet vend armikut për të dëmtuar dinjitetin e jordanezëve duke arrestuar dhe burgosur një anëtar të parlamentit”, tha Atiya.

Izraeli gëzon lidhje të ngushta sigurie me Jordaninë, fqinjin arab me të cilin ndan kufirin më të gjatë, por marrëdhëniet politike janë acaruar vitet e fundit për shkak të qëndrimit të Izraelit për të drejtën e palestinezëve për një shtet.

Shumë nga qytetarët e mbretërisë janë me origjinë palestineze.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.