Drejtori i Forumit për Marrëdhënie Etnike në Serbi, Dushan Janjiç, në një prononcim për agjencinë serbe të lajmeve “Beta”, tha se marrëveshjet e Brukselit dhe Ohrit ndërmjet Kosovës dhe Serbisë nuk kanë një paketë sigurie dhe se ato “nuk përfshijnë bashkëpunimin e ushtrisë dhe policisë” për shkëmbimin e të dhënave të sigurisë.
“Ekzistenca e një vakuumi të sigurisë dhe mungesa e dialogut për kthimin e serbëve në institucionet e Kosovës mund të jetë shkas për demonstrata të reja, e më pas barrikada, madje edhe konflikte të armatosura”, vlerësoi Janjiç.
Mbrëmjen e së shtunës janë djegur tri vetura në Leposaviq, komunë e banuar me shumicë serbe në veri të Kosovës. Dy prej veturave ishin me targa të Kosovës, ndërsa njëra me targa të Serbisë, prandaj Janjiç e sheh rrezikun në rikthimin e tensioneve në këtë pjesë.
Policia e Kosovës njoftoi se e kishte arrestuar një pjesëtar të komunitetit serb në Mitrovicën e Veriut nën dyshimin se, ndër të tjera, ka marrë pjesë në djegien e një veture. Lista Serbe, partia më e madhe e serbëve të Kosovës, paralajmëroi se nëse i arrestuari nuk lirohet, do të shkaktohet “reagimi nga serbët”.
“Tani jemi dëshmitarë të përsëritjes së të gjitha dobësive të politikave të mëparshme, të cilat u shkaktuan nga menaxhimi i konfliktit nga të dyja palët. Ndërmjetësuesit ndërkombëtarë kanë insistuar vazhdimisht që shkaqet e konfliktit të eliminohen dhe të vazhdojmë të flasim për normalizimin e marrëdhënieve”, tha Janjiç.
“Plani për normalizimin e marrëdhënieve mund të dështojë për shkak të vakumit të sigurisë. Me normalizimin e marrëdhënieve, Lista Serbe do të ishte një humbëse e madhe politike dhe tani me kërcënimin e kryengritjes kombëtare për shkak të targave, po përpiqen të tregojnë ekzistencën e tyre”, shtoi ai.
Zëvendëskryeministri i Kosovës, Besnik Bislimi dhe shefi i të ashtuquajturës “Zyrë për Kosovën” në Qeverinë e Serbisë, Petar Petkoviç , do të takohen më 4 prill në Bruksel për të diskutuar për hapat e ardhshëm në zbatimin e Marrëveshjes për rrugën drejt normalizimit të marrëdhënieve ndërmjet Kosovës dhe Serbisë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Muhaxheri: Sveçla është në koordinim me Serbinë për sa i përket konfiskimit të armatimit në Veri
-
Vuçeviç e Hill diskutojnë për situatën “problematike” në Kosovë
-
Takimi Kurti – Krasniqi, Hamza: S’duhet të shihet si diçka e jashtëzakonshme
-
Policia konfiskon armë në Veri, i dyshuar është një ish-zyrtar policor
Lajmet kryesore
-
Policia konfiskon armë në Veri, i dyshuar është një ish-zyrtar policor
-
Wisner nga Kukësi: Presim përparim për hidrocentralin e Skavicës
-
Von der Leyen injoron të djathtën në Itali, takohet me Tajanin ndërsa eviton Melonin
-
Pas kërkesës së Bardhit, SPAK cakton 24 majin për dëshminë e tij lidhur me dosjen ‘Xibraka’