Izrael: Miri Regev, gati për të udhëhequr Likud post-Netanyahu

“Në ditën pasi Netanyahu të japë dorëheqjen, unë do të kandidoj për të çuar përpara udhëheqjen e partisë”.

Kështu ka njoftuar politikania izraelite Miri Regev të hënën e 17 janarit, sa u përket synimeve të saj për të kandiduar për postin e kryetares së partisë Likud të Izraelit, kur kreu Benjamin Netanyahu të largohet nga politika.

“Këtë e kam thënë në të kaluarën dhe po e rithem”, ka theksuar për “Radio Kol Chai” anëtarja e Parlamentit të Izraelit, Knesset, nga krahu opozitar.

Regev shërbeu si ministre e Kulturës dhe Sportit nga viti 2015 deri në 2020-ën dhe si ministre e Transportit nga 2020-ta deri në 2021-shin.

Ajo hyri për herë të parë në Knesset nga lista e Likud-it në vitin 2009.

Netanyahu ka udhëhequr Izraelin për 12 vjet radhazi si kryeministri më jetëgjatë në pushtet, përpara se të rrëzohej verën e kaluar nga një koalicion ideologjikisht i larmishëm i bashkuar për ta parë atë të largohej nga rezidenca zyrtare e Jerusalemit në Balfour.

Raportet e fundit tregojnë përparim në bisedimet midis Netanyahu-t dhe Prokurorit të Përgjithshëm, Avichai Mandelblit, për një marrëveshje, e cila ka të bëjë me pranimin e fajësisë në gjyqin e tij për korrupsion.

Në marrëveshjen e raportuar, Netanyahu do të pranojë dy akuza për shkelje të besimit.

Marrëveshja e raportuar do të shihte vetëm heqjen e akuzave për ryshfet kundër Netanyahu-t, megjithatë atij do t’i kërkohet të pajtohet me një dënim që përfshin “turpin moral”.

Kjo do ta përjashtonte atë nga jeta publike për të paktën shtatë vjet, me shumë gjasa duke i dhënë fund karrierës së tij politike.

Regev i tha “Radio Kol Chai” se ajo shpreson që Netanyahu të mos detyrohet të largohet nga politika si kusht për marrëveshjen për pranimin e fajësisë.

“Shpresoj që ai të qëndrojë, është e drejtë që ai do të qëndrojë, dhe sigurisht kur të shohim situatën e rasteve kundër tij dhe dëshmitarëve të shtetit”, tha Regev.

Ajo e përmbylli duke thënë se, “nuk mendoj se ai po heq dorë nga lufta publike, kjo është një çështje personale e tij dhe familjes së tij – ai është i persekutuar prej vitesh. Është një çështje private dhe unë do ta respektoj çfarëdo vendimi që ai të marrë. Po të isha në vendin e tij, do të vazhdoja ta luftoja. Kaq shumë njerëz janë të bindur për pafajësinë e tij”.

Për çfarë akuzohet tjetër Netanyahu?

Ish-kryeministri akuzohet për tregtimin preferencial për një kompani të madhe izraelite në këmbim të artikujve pozitivë në faqen e saj të lajmeve “Walla”.

Ai është gjithashtu i pandehur në një rast të dytë, që përfshin pretendimet për kërkimin e mbulimit të favorshëm, dhe një të tretë që pretendon se ka marrë dhurata me vlerë qindra mijëra dollarë nga miqtë e pasur.

72-vjeçari i refuzoi thirrjet për të dhënë dorëheqjen, pasi u padit në vitin 2019-ën, duke përdorur podiumin si kryeministër për të sulmuar vazhdimisht forcat e rendit, mediat dhe Gjykatat për kryerjen e një “gjueti shtrigash” kundër tij.

Gjyqi i tij filloi zyrtarisht në vitin 2020, ndërsa vendi ishte përfshirë në një krizë politike 2-vjeçare, gjatë së cilës pati katër zgjedhje.

Procedurat kundër tij pritej të zvarriteshin për vite me radhë – por me përfundimin e mandatit të Mandelblit si Prokuror i Përgjithshëm në fund të këtij muaji dhe zëvendësimi i tij nuk ka gjasa t’u japë përparësi rasteve të Netanyahu-t, duket se ekipi ligjor i ish-kryeministrit ka hapur derën për pranimin e fajësisë.

Presidenti i Gjykatës së Lartë në pension, Aharon Barak, një aleat i vjetër i Netanyahu-t, thuhet se ka vepruar si ndërlidhës mes ish-kryeministrit dhe prokurorëve të shtetit.

“Për mendimin tim, kjo është një aktakuzë dhe gjyq unik, që po shkakton një përçarje në komb. Në përpjekjen për të shëruar këtë përçarje, një marrëveshje e pranimit të fajësisë është opsioni i preferuar. Ky pozicion është pozitiv dhe jetik për shtetin e Izraelit”, tha ai, duke folur për mediumin e lajmeve “Ynet”.

Sipas një marrëveshjeje për pranimin e fajësisë, Netanyahu mund të përjashtohet nga jeta politike deri në shtatë vjet, duke i dhënë fund karrierës së tij.

Kjo do të shkaktojë gjithashtu një garë lidershipi për partinë, e cila mund të shkojë në një luftë të brendshme për zgjedhjen e një kryetari të ri.

Megjithatë, nëse partia arrin të bie dakord tërësisht për një lider të ri, elementët e djathtë të koalicionit qeverisës mund të konsiderojnë heqjen e marrëveshjes aktuale në favor të një qeverie më koherente politikisht me karrigen e re të Likud në krye të saj.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.