ICC-ja do të lëshojë urdhër-arrestet e para të lidhura me pushtimin rus të Ukrainës

Prokurori në Gjykatën Penale Ndërkombëtare do të hapë zyrtarisht dy raste të krimeve të luftës dhe do të lëshojë urdhër-arreste për disa rusë.

Këta të fundit, konsiderohen përgjegjës për rrëmbimin masiv të fëmijëve ukrainas dhe shënjestrimin e infrastrukturës civile ukrainase, sipas raporteve të së hënës.

Agjencia e lajmeve “New York Times” dhe “Reuters” raportuan se prokurori, Karim Khan, do t’u kërkonte gjyqtarëve të procedurës paraprake të miratonin urdhër-arrestet në bazë të provave të mbledhura deri më tani.

Nëse do të ketë sukses, do të ishte hera e parë që lëshohen urdhër të ICC-së në lidhje me pushtimin rus të Ukrainës.

Nuk është e qartë nëse urdhrat do të vulosen, gjë që do t’i linte të dyshuarit të hamendësonin nëse ata ishin të implikuar.

Nuk ka gjasa që urdhër-arrestet të çojnë në gjyqe pasi GJNP-ja nuk do t’i gjykojë të pandehurit në mungesë dhe Rusia, e cila nuk është anëtare e GJNP-së, ka shumë pak gjasa t’i dorëzojë ato në gjykatë, me seli në Hagë.

Raportet për urdhër-arrestet e afërta vijnë pak më shumë se një vit pasi Khan hapi një hetim mbi krimet e mundshme të luftës, krimet kundër njerëzimit dhe gjenocidin në Ukrainë.

Gjatë 12 muajve të fundit, ai ka bërë tre udhëtime në Ukrainë dhe ka vizituar vende të dyshuara për krime lufte.

Rusia ka qenë e hapur për marrjen e fëmijëve dhe adoleshentëve ukrainas në Rusi dhe dhënien e tyre te familjet ruse, por e ka bërë këtë nën maskën e shpëtimit humanitar.

Një nga ndihmësit e Putin-it, Maria Lvova-Belova, komisionerja presidenciale për të drejtat e fëmijëve, është cituar të ketë thënë se 350 fëmijë ishin birësuar nga familjet ruse dhe se më shumë se 1 mijë të tjerë ishin në pritje të birësimit.

Në shkurt, Laboratori Humanitar i Yale publikoi një raport që pretendonte se të paktën 6 mijë fëmijë nga Ukraina ishin dërguar në kampet ruse të “riedukimit” vitin e kaluar, me disa qindra të mbajtur atje për javë ose muaj përtej datës së planifikuar të kthimit.

Raporti tha gjithashtu se Rusia kishte përshpejtuar në mënyrë të panevojshme birësimin dhe edukimin e fëmijëve ukrainas.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.