Ian Bremmer: “Prigozhin kishte pak shanse, por regjimi është ende në kaos”

Për të kuptuar se çfarë po ndodh në Rusi, duhet të tregojmë momentin kur Putin-i, duke takuar disa blogerë ushtarakë disa ditë më parë, konfirmoi urdhrin që Ministria e Mbrojtjes i kishte dhënë kujtdo që luftonte në Ukrainë, si mercenarët e Wagnerit, për të nënshkruar një kontratë me ushtrinë ruse deri më 1 korrik.

Prigozhin e refuzoi ftesën. Ian Bremmer, analist strategjik, themelues i Eurasia Group, citon këtë episod si elementin kulmor të konfliktit midis Prigozhin dhe Putin dhe e përkufizon atë si një “akt të paprecedentë mosbindjeje”.

“Prigozhin, duke refuzuar një urdhër të Putin-it, e vuri veten në një situatë të paqëndrueshme. Shefi i Wagner-it e merr fuqinë e tij nga mercenarët që ai kontrollon, që numërohen në dhjetëra mijëra, dhe shumë prej tij që ai pa të vdisnin në Ukrainë. Prej muajsh ka sfiduar autoritetet ushtarake, por e gjeti veten të mbyllur në një cep nga i cili u përpoq të dilte me atë që unë do ta quaja një akt dëshpërimi”.

Kështu deklaron ai fillimisht në një intervistë për gazetën italiane “La Stampa”.

A ishte përparimi në Moskë një akt i dëshpëruar? Për Bremmer-in, Prigozhin e provoi fatin sikur të ishte “lojë me zara”, duke menduar: ose do të rrëzoj udhëheqjen ushtarake ose do të vdes në një atmosferë lavdie.

“Prigozhin nuk do të ketë sukses në largimin e Putin-it”, thekson analisti strategjik.

Sipas tij, ajo që po ndodh është “shumë e rrezikshme” për kreun e Kremlin-it.

“Prigozhin është një mjet i krijuar nga vetë Putini. Por atëherë ata mercenarë të nivelit të lartë që janë Wagnerët janë bërë të pavarur nga Kremlini, jashtë kontrollit, nuk janë më besnikë dhe janë një kërcënim për sigurinë e qeverisë dhe popullatës. Kjo është arsyeja pse Putini i dha urdhër ushtrisë së tij për t’i hequr qafe”, shtoi ai gjatë intervistës për botimin italian.

Ian Bremmer mendon se është një situatë e ndërlikuar që e vendos presidentin rus në një pozicion dobësie në frontin e brendshëm.

“Është e mundur që mbikëqyrja të intensifikohet dhe të ketë një mobilizim për të forcuar stabilitetin e sistemit rus dhe atij të presidentit. Në këtë klimë, kushdo që dyshohet minimalisht për pabesi do të eliminohet. Jam i sigurt se do të shohim gjëra të tilla”, garantoi analisti.

Sa i takon Rusisë në frontin ukrainas, Bremmer arsyeton se do të ketë tërheqje taktike në disa zona më të lehta për t’u mbrojtur dhe kjo do t’i lejojë ukrainasit të fitojnë terren.

“Unë parashikoj dezertime në ushtrinë ruse, por edhe zgjedhje drastike nga Kremlini për të mbrojtur disa zona, si Krimea. Pra, lajmi i mirë për Ukrainën e aftë për të rifituar territore balancohet nga lëvizjet që Putini, i mbyllur në qoshe, mund të bëjë për të shmangur një përplasje”, tregoi ai.

Në lidhje me heshtjen e autoriteteve kineze, Bremmer vëren se Xi Jinping do të ketë diçka pozitive për të thënë.

“Pasi situata të jetë më e qartë dhe Putini të ketë kapërcyer krizën, Xi Jinping do të ketë diçka pozitive për të thënë. Tani linja është që të përcaktohen ngjarjet si një çështje e brendshme. Pekini nuk do të japë ndihmë ushtarake dhe nuk do të marrë rreziqe të panevojshme”, ravijëzoi analisti në përmbyllje.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.