Lajçak pret përgjigje konstruktive nga Kosova e Serbia mbi kompromisin e propozuar për dinarin

I dërguari Special i Bashkimit Evropian për dialogun Kosovë-Serbi, Miroslav Lajçak, ka thënë se pret nga Kosova dhe Serbia që të arrijnë një marrëveshje për çështjen e dinarit, teksa ka treguar se bashkë me ekipin e tij kanë paraqitur një “propozim kompromisi”.

“Pas diskutimeve të gjera dhe dëgjimit nga afër të të dyja palëve, ekipi im dhe unë kemi paraqitur një propozim kompromisi. Unë pres me padurim reagimet e tyre konstruktive, ndërsa ne punojmë drejt gjetjes së një rruge përpara”, ka shkruar Lajçak në Facebook, teksa ka bërë bilancin e javës, ku ka treguar për takimet që i ka pasur.

Më 27 prill, negociatorët e Kosovës dhe Serbisë u mbyllën mbi shtatë orë në një prej zyrave të Bashkimit Evropian (BE) në Bruksel të Belgjikës për t’i vazhduar negociatat mbi çështjen e dinarit, por që – sërish – rezultuan pa marrëveshje.

Zëvendëskryeministri i Kosovës, Besnik Bislimi, njëherësh shef i delegacionit kosovar, tha pas ciklit të ri të dialogut se Serbia pati “qëndrime shqetësuese” sa i përket çështjes së dinarit, ndërsa shtoi se në vend që palët të gjejë njëfarë mesi të kënaqshëm për zgjidhjen e kësaj çështjeje, destruktiviteti/dekonstruktiviteti i Serbisë zgjeroi hendekun e qëndrimeve.

Ndërkaq delegacioni serb në udhëheqjen e drejtorit të ashtuquajturës “Zyrë për Kosovë” në Qeverinë e Serbisë, Petar Petkoviç, pretendoi se pala serbe tregoi “konstruktivitet” për dinarin, ndërsa akuzoi Kosovën se nuk dëshiron të pajtohet për asgjë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.