![](https://albanianpost.com/wp-content/uploads/2021/09/BA977449-AB1A-420C-9EDC-CF87D95C1452.jpeg)
Cristiano Ronaldo sapo ka arritur të bëhet futbollisti me më së shumti gola në histori të kombëtarëve.
Ai ka parakaluar iranianin Ali Daei, që kishte 109 gola.
Në ndeshjen e Portugalisë përballë Irlandës, në mënyrë heroike, Ronaldo u kthye nga figura më “e urryer” e mbrëmjes, në heroin e saj.
Pas 15 minutave lojë, portugezi shpërdoroi mundësinë e artë, duke gabuar nga pika e penalltisë.
Irlanda shfrytëzoi gabimin e Ronaldo-s, e pjesën e parë e mbylli në epërsi.
Deri në fund, u duk se ishullorët po shkonin drejt një fitoreje të madhe në tokën luzitane, derisa në skenë, u ngjit Cristiano Ronaldo.
Fillimisht, në minutën e 89-të, ai barazoi duke shënuar me kokë për 1-1.
Ky gol ishte edhe ai i historisë, me Cristiano-n që u shndërrua në golashënuesin më të mirë të të gjitha kohërave në futbollin e kombëtareve.
Por, ai nuk u ndal vetëm me kaq.
Në minutën e 96-të, kur ndeshja po afrohej drejt vërshëllimës së trefishtë, Ronaldo fluturoi përsëri.
Portugezi arriti që përsëri me kokë, të gjejë rrugën e rrjetës, duke i siguruar Portugalisë fitoren në një mënyrë shumë të bukur.
Për të shkruar historinë, u desh një ndeshje historike, Cristiano e bëri.
Golashënuesi më i mirë për klube, golashënuesi më i mirë në histori të sportit, tani bëhet edhe më i miri në histori të kombëtareve.
785 gola në karrierë, por Ronaldo duket se nuk dëshiron të ndalet.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com